अव्यवस्थित तार हटाउने कार्यले यातायात आवागमन प्रभावित

२५ वैशाख, काठमाडौं ।  काठमाडौं महानगरले महानगर क्षेत्रभित्रका बिजुली पोलमा गुजुल्टिएका र सडकमा अलपत्र छाडिएका तार हटाउने सुरु गरेको छ । महानगरको प्रहरी टोलीसहित परिचालित टिमले सोमबारदेखि माइतीघर क्षेत्रका तार हटाउन सुरु गरेको हो । तार हटाउने कार्य न्यूरोड, बसन्तपुर र असन क्षेत्रमा पनि आजै सुरु भएको छ । 

अव्यवस्थित तारले शहर बजार र महानगरको सुन्दरतालाई कुरुप बनाएको भन्दै महानगरले यही वैशाख २७ गतेसम्मको समयसीमा तोकेर तार व्यवस्थापन गर्न इन्टरनेट सेवा प्रदायक कम्पनी र नेपाल दूर संचार प्राधिकरणको नाममा सूचना प्रकाशित गरेको थियो । व्यवस्थापनमा असयोग गर्ने र हटाउन पनि अटेर गरेमा महानगर आफैंले हटाउने चेतावनीमूलक सूचना समेत दिइएको थियो । 

सो चेतावनीपछि आइतबार महानगर, कम्पनी र प्राधिकरणका प्रतिनिधिबीच छलफल हुँदा तार कतिपाय स्थानमा तार राख्ने पक्ष र कतिपय स्थानका महानगरले हटाउन सहमत भएको थियो । हटाउँदा सेवा अवरुद्ध नहुने तरिकाले गर्ने सहमति पनि भएको थियो । 

सोही अनुरुप अहिले माइतीघर मण्डला–थापाथली सडक खण्डका बिजुली पोलमा गुजल्टिएका तार हटाउने कार्य चलिरहेको छ । हटाउन वर्ल्ड लिंक लगायत इन्टेरनेट सेवा प्रदायक कम्पनीका कर्मचारी र महानगरको टोली खटिएको छ । 

तार हटाउने क्रममा यस क्षेत्रमा यातायात आवगमन समेत प्रभावित हुन पुगेको छ । पोलमा रहेको तार हटाउँदा तार सडक लत्रिएर यातायात प्रभावित भएको हो । ट्राफिकलाई सवारी व्यवस्थापनमा धौ–धौ परेको देख्न सकिन्छ । माइतीघरमण्डला–थापाथली ट्राफिक जाम लामो दूरीसम्म परेको र यात्रुले गुनासो गर्ने गरिएको संवाददाताले जनाएका छन् । 

तार हटाउने क्षेत्र र रुटबारे प्राधिकरणले आज सार्वजनिक सूचना समेत जारी गरेको छ ।