कांग्रेसमा युवा अभियान, सातै प्रदेशमा तोकिए संयोजक

२५ वैशाख, काठमाडौं । पार्टी नेतृत्व कोठे बैठकमा सिमित रहेका बेला नेपाली कांग्रेसका युवा नेताहरूले देशव्यापी पार्टी रुपान्तरणको अभियान थालेका  छन् ।  पार्टीको संस्थापन र इतर समूहका शीर्ष नेताहरूको सहभागिता विना नै युवा नेताहरूले देशव्यापी अभियान सुरु गरेका हुन् । यो अभियानमा कुनै पनि गुटको प्रवेश र सन्देश नदिने भएनिएपनि  संस्थापन भनेर चिनिएका युवा नेताहरुको सहभागित भने देखिएको छैन् ।  

उपनिर्वाचनको परिणामपछि नेपाली कांग्रेसमा चलेको रुपान्तरणको बहसलाई तीव्रता दिँदै कांग्रेसका युवा नेताहरूले देशव्यापी पार्टी रुपान्तरण अभियान थालेका हुन् । रुपान्तरण अभियानअन्तर्गत गत बिहीबार काठमाडौंमा बृहत् भेला गरेका नेताहरूले सातै प्रदेशमा रुपान्तरण अभियानको संयोजक तोकेका छन् । तािकिएका संयोजकले प्रदेशमा भेला आयोजना गराउने छन् । 

अभियानले सातै प्रदेशमा कांग्रेसमा रुपान्तरण र सुधारका लागि छलफल, अन्तरक्रिया र सुझाव संकलन गर्ने नेताहरूले बताएका छन् । शनिबार र आइतबार निरन्तर छलफलपछि नेताहरूले सात प्रदेशमा संयोजक तोकेका हुन् । यो अभियानलाई वडा तहसम्म पुर्याउने नेताहरुके भनाइ छ । केन्द्रबाट सुरुभएको अभियान वडा तहसम्म पुर्याउने र वडा तहलाई विषेश प्रभावकारी रुपमा परिचालन गर्ने कर्णाली प्रदेशका संयोजक भुपेन्द्र शहीले नेपाल बहसलाई जानकारी दिए । 

अभियानका लागि कोशी प्रदेशमा गुरुराज घिमिरे, मधेशमा रञ्जित कर्ण, वाग्मतीमा मधु आचार्य, गण्डकीमा देवराज चालिसे, लुम्बिनीमा गोविन्द पोखरेल, कर्णालीमा भुपेन्द्रजंग शाही र सुदूरपश्चिममा भरत खड्कालाई संयोजक तोकिएको छ । सबै प्रदेशमा अभियान एक साथ संञ्चालन हुनेछ । 

उनीहरूमध्ये आचार्य र पोखरेल वर्तमान केन्द्रीय कार्यसमितिका सदस्य हुन् भने घिमिरे र शाही प्रदेश सभापतिका प्रत्याशी थिए । चालिसे केन्द्रीय सहमहामन्त्रीको उम्मेदवार थिए । उनीहरू सबै नेता शेखर कोइराला पक्षका नेता हुन् ।

नेता शाहीले  पार्टीमा रुपान्तरण र सुधारका लागि आफूहरूले देशव्यापी अभियान सञ्चालन गर्ने निर्णय गरेको बताए । ‘सातै प्रदेशमा पार्टी सुधारका लागि विकल्पहरू के–के हुन सक्छन् ? हामीले छलफल गर्ने, बहस गर्ने र सुझाव लिने अभियान चलाउँछौँ,’ उनले भने, ‘अहिले संयोजक तोकिएको छ, अब त्यहाँ टिम बन्छ ।’ उनले आफूहरूले कांग्रेसभित्र सुधारका लागि अन्तरसंघर्षको सुरुआत गरेको बताए ।