ढाकाकुमारको रिट सुनुवाइ न्यायाधीश श्रेष्ठको इजलासमा हुने

२५ वैशाख, काठमाडौं । सांसद र पार्टीको साधारण सदस्यबाट हटाउने राष्ट्रिय स्वतन्त्र पार्टी (रास्वपा)को निर्णयविरूद्ध पूर्वसांसद ढाकाकुमार श्रेष्ठले दिएको रिट निवेदनमा आज सुनुवाइ हुने भएको छ । 

आइतबार दायर रिटमा सुनुवाइका न्यायाधीश तिलप्रसाद श्रेष्ठको  एकल इजलासमा पेशी तोकिएको छ । रिटमा निवेदक श्रेष्ठले श्रेष्ठले आफूलाई सांसदमा पुनर्वहाली गर्न माग गरिएको छ । 

गत पुष महिना उनले आफू स्वास्थ्यमन्त्री हुने र त्यसमा पार्टीलाई रकम बुझाउनुपर्ने भन्दै झापाका मेडिकल व्यवसायी दुर्गा प्रसाईंसँग दुई करोड पचाल लाख रुपैयाँ घुस रकम मागेको भनिएको अडियो रेकर्ड बाहिरिएपछि रास्वपाले सांसद पद र पार्टीको साधारण सदस्यबाट हटाएको थियो । गएको मंसिर ४ मा सम्पन्न प्रतिनिधिसभा निर्वाचनमा प्राप्त समानुपातिक मततर्फ रास्वपाले कास्कीबाट श्रेष्ठ समानुपातिक सांसद बनाएको थियो ।

रास्वपाको निर्णयका आधारमा सभामुख देवराज घिमिरेले यही वैशाख १५ मा सम्पन्न हिउँदे अधिवेशनअन्तर्गत प्रतिनिधिसभाको बैठकमा श्रेष्ठ पदमुक्त भएको सूचना दिएका थिए ।

पार्टीबाट पदमुक्त भएको केही दिनपछि श्रेष्ठले पत्रकार सम्मेलन गर्दै आफू निर्दोष रहेको र कानूनी उपचारमा गएर न्यायालयबाट ‘क्लिन चिट’ लिएर आउने बताएका थिए । 

श्रेष्ठको स्थानमा रास्वपाले एसिड पीडित बिन्दाबासिनी कंसाकारलाई नियुक्त गर्न निर्वाचन आयोगमा निवदेन दिइसकेको छ ।