किसान कार्ड तत्काल लागू गर्न संसद बैठकमा माग

२५ वैशाख, काठमाडौं । नागरिक उन्मुक्ति पार्टीका सांसद गंगा चौधरीले किसानलाई प्रत्यक्ष सुविधा दिन किसान कार्ड लागू गर्न सरकारसँग माग गरेका छन् । 

सोमबार बसेको प्रतिनिधिसभाको बैठकमा विशेष समयमा बोल्दै सांस चौधरीले गणतन्त्रका सरकारले किसानलाई घोर उपेक्षा गरेको भन्दै आपत्ति जनाए । उनले किसानलाई पेशाबाट पलायन हुन निदन र अर्थतन्त्रलाई कृषिमुखी बनाएर आत्निर्भरताको बाटो लैजान किसान कार्ड जरुरी भइसकेको बताए ।

किसानको धानको मूल्य तोक्ने तर धान नकिन्ने सरकार जनताको हितमा हुन नसक्ने भन्दै अधिकारका लागि किसान सडकमा आउने चेतावनी दिए । मल खरिदका लागि अर्बौं रुपैयाँ विदेश पलायन गराउने काममा सरकारमा बस्नेहरु नै लागिरहेको बताउँदै मल कारखाना बनाउन बजेट छुट्याउन माग गरे ।

अर्को प्रसंगमा थारु समूदायमा मात्र फैलिइरहेको सिकलसेल एनिमिया रोग नियन्त्रणका लागि तत्काल ठोस कार्याक्रम बनाएर लागू गर्न माग गरे । रोग नियन्त्रण हुन नसके थारु समुदायको अस्तित्व नै निमिट्यान्न हुने खतरा बढेको औल्याए