प्रतिनिधिसभा बैठक १५ मिनेटका लागि स्थगित

२५ वैशाख, काठमाडौं । बजेट अधिवेशन अन्तर्गत सोमबार बसेको प्रतिनिधिसभाको बैठक १५ मिनेटका लागि स्थगित भएको छ । आइतबारको बैठकमा अर्थमन्त्री डा. प्रकाशशरण महतले सदनमा छलफलका लागि पेस गरेका आर्थिक वर्ष २०८०/८१ को लागि विनियोजन विधेयकका सिद्धान्त र प्राथमिकतामाथि सोमबार सांसदहरुले धारणा राख्ने क्रम चलेको छ ।

छलफलका क्रममा विपक्षी दलका सांसदहरुले छलफलमा प्रस्तावका प्रस्तावक अर्थात अर्थमन्त्री महत अनुपस्थित रहेको भन्दै सभामुखको ध्यानाकर्षण गराएपछि महत अनुपस्थित नभइन्जेलसम्मका लागि भन्दै सभामुख देवराज घिमिरेले बैठक १५ मिनेटका लागि स्थगित भएको घोषणा गरे । 

अर्थमन्त्र राष्ट्रिय सभाको बैठकमा सभागी भइरहेकाले प्रतिनिधिसभा बैठकमा आउन समय लाग्ने जानकारी सभामुख घिमिरेले सदनलाई दिए । महतको अनुपस्थितिले संसद नियमावलीको उल्लंघन गरेको भन्दै एमाले, रास्वपाका सांसदहरुले विरोध जनाएका थिए ।

बैठक संचालन गरिरहेकी उपसभामुख इन्दिरा रानाले उठेका सदस्यहरूलाइ बस्न अनुराेध गरिरहे पनि नियमावलीले महतकाे उपस्थिति अनिवार्य गरेकाे भन्दै बस्न मानेनन् । त्यसपछि ‘उहाँ आउनुहुन्छ, एकछिन ब्रेक गराैं न त‘ भनिनन् । तर एमालेका सांसद रघुजी पन्तले ‘संसदमा ब्रेक भन्ने हुँदैन, स्थगित भन्ने हुन्छ’ भनेपछि उपसभामुख अक्मकिइन् । अनि उनले सभामुखज्यू आउनुहुन्छ भन्दै बैठकबाट निस्कने संकेत दिइन् । नभन्दै सभामुख देवराज घिमिरे आए । उनी हिँडिन् ।  घिमिरेले नै बैठक स्थगित भएकाे घाेषणा गरे ।