कालिकाेटामा बलात्कार आरोपित हत्कडीसहित फरार

२५ वैशाख, काठमाडौं । कालीकोटमा एक बलात्कार आरोपी हत्कडीसहित फरार भएका छन् । बलात्कारको आरोपमा पलाँता गाउँपालिका–६ का ३१ वर्षीय शंकर बुढालाई सोमबार बिहान पक्राउ गरी इलाका प्रहरी कार्यालय पलाँतातर्फ लैजाने क्रममा स्थानीयले प्रहरीमाथि ढुंगामुढा गरेपछि भएको झडपका क्रममा हत्कडीसहित फरार भएका हुन् ।  बुढालाई सोही ठाउँका एक महिलामाथि बलात्कार गरेको आरोप छ । 

ढुंगामुढाले लागेर इलाका प्रहरी कार्यालयका सहायक प्रहरी निरीक्षक लक्ष्मी ढुंगेल रावल घाइते भएका छन् । अर्का  एक स्थानीय घाइते भएको प्रहरीले जनाएको छ । 

फरार बुढाको खोजीका लागि जिल्ला प्रहरी कार्यालय र वरपरका प्रहरी चौकीबाट थप टोली खटिएको छ । बुढाले २०७९ असोज ३१ गते गाउँकै एक महिलालाई जबर्जस्ती करणी गरेको कसुरमा जाहेरी परेका आधारमा पक्राउ गरिएको प्रहरीले जनाएको छ । घटना लगत्तै लुकीछिपी बस्दै आएका बुढालाई आज बिहान मात्र पक्राउ परेका थिए ।