बझाङ र दार्चुला हिमपहिरोमा बेपत्ता २ महिलाको शव फेला

२५ वैशाख, काठमाडौं । गत साता बझाङमा गएको हिमपहिरोमा पुरिएर बेपत्ता भएकी महिलाको शव फेला परेको छ । सुर्मा गाउँपालिका–१ देवडी घर भएकी ३३ वर्षीया झल्नादेवी बोहराको शव फेला परेको प्रहरीले जनाएको छ । 

यार्सागुम्बा संकलनको लागि छोरासहित पार्थिहिमाल गएको अवस्थामा उनी वैशाख १९ गते हिमपहिरोमा परेर बेपत्ता भएकी थिइन् ।

स्थानीय, नेपाल प्रहरी र सशस्त्र प्रहरीले निरन्तर जारी राखेको खोजीका क्रममा आज सोमबार बिहान मात्र शव फेला परेको जिल्ला प्रहरी कार्यालय बझाङका प्रमुख (डिएसपी) जागेश्वर भण्डारीले बताए ।

यस्तै, दार्चुलाको हिम पहिरोमा परेका थप एक जनाको शव भेटिएको छ । १९ वैशाखमा दार्चुलाको ब्यास गाउँ पालिकामा गएको हिमपहिरोमा बेपत्ताको खोजीका क्रममा एकजनाको शव फेला परको हो । 

डोटीको जोरायल गाउँपालिका–२ कि २८ वर्षीया इश्वरी थापाको शव सशस्त्र प्रहरी बल नं. ५० गुल्म छाङ्रुको टोलीले फेला पारेको सशस्त्र प्रहरीका डीएसपी तथा सहप्रवक्ता शैलेन्द्र थापाले जानकारी दिए ।

यसअघि ३ जनाको शव फेला परेकै ठाउँमा उनको शव फेला परेको उनले बताए । हिमपहिरोमा अझै एक जना बेपत्ता छनु । उनको खोजी भइरहेको पनि सशस्त्र प्रहरीले जनाएको छ ।

बहुमूल्य जडिबुटी यार्सा गुम्बा टिप्न गएका उनीहरु त्रिपालमुनि बसिरहेका बेला माथिबाट आएको हिमपहिरोमा पुरिएका थिए । केहीले भागेर ज्यान जोगाएका थिए ।