रवि लामिछानेविरुद्ध सर्वोच्चमा रिट, दर्ताबारे भाेलि टुंगाे लाग्ने

२५ वैशाख, काठमाडौं । राष्ट्रिय स्वतन्त्र पार्टी (रास्वपा)का सभापति रवि लामिछानेविरुद्ध सर्वोच्च अदालतमा रिट निवेदन पुगेको छ । सिन्धुलीका युवराज पौडेल लामिछाने प्रतिनिधिसभा सदस्य पदमा बहाल रहन अयोग्य रहेको पद खारेजीको माग गर्दै रिट निवेदन बोकेर सोमबार सर्वोच्च पुगेका हुन् । 

लामिछाने सांसद रहिरहँदा कानुनको शासन र संवैधानिक सर्वोच्चतामाथि नै गम्भीर प्रश्न उठ्ने दाबी रिटमा गरिएको छ । मुद्दाको अन्तिम टुंगो नलाग्दासम्म उनलाई प्रतिनिधिसभा सदस्यको रुपमा कार्य गर्न रोक लगाउन माग गरिएको छ । 

लामिछानेले पुनः नागरिकता प्राप्त गर्ने प्रक्रियामा नै प्रवेश नगरी गत माघ १५ मा नागरिकताको प्रतिलिपी लिएको जिकिर रिट निवेदनमा गरिएको छ ।यसअघि पौडेल लगायतले दायर गराएका रिटमाथि सर्वोच्चले सुनुवाइ गर्दै गएको माघ १३ गते शुक्रबार लामिछानेको पुरानो नागरिकता खारेज गरिदिएको थियो । सर्वोच्चकै आदेशबमोजिमम उनले दुई दिनपछि माघ १५ मा काठमाडौं जिल्ला प्रशासन कार्यालयबाट पुनः नागरिकता लिएका थिए । त्यसैलाई पौडेलले योपटक आफ्नो रिटमा मुख्य आधार बनाएका छन् ।

सोही प्रतिलिपिका आधारमा लामिछाने चितवन २ मा यही वैशाख १० मा भएको उपनिर्वाचनमा  भारी मतान्तरले विजयी भएका थिए । उनी रास्वपाका संसदीय दलका नेता समेत बनेका छन् । रिट दर्ता गर्ने वा नगर्नेबारे छलफलका लागि पौडेललाई सर्वोच्च प्रशासनले मंगलबार बोलाएको बताएका छन् ।