लोक सेवा आयोगको डाटा सुरक्षित राख्न नसक्नेलाई कारबाही गर्न माग

२६ वैशाख, काठमाडौं । मंगलबार बसेको प्रतिनिधिसभाको बैठकमा आवेदकहरुको डाटा सुरक्षा गर्न नसक्ने लोक सेवा आयोगका कर्मचारीमाथि कारवाही गर्न माग गरेका छन् । 

बैठकको शून्य समयमा बोल्दै राष्ट्रिय स्वतन्त्र पार्टी (रास्वपा)की सांसद निशा डाँगीले लोक सेवा आयोगको डाटा हराएको घटनामा जिम्मेवार व्यक्तिलाई कारबाही गर्न माग गरिन् । लोक सेवा आयोगमा दरखास्त दिएका झन्डै ४ लाख आवेदकको डाटा हराएपछि आयोगले आवेदकहरुसँग पुनः आवेदन आह्वान गरेको छ । 

जारी प्रतिनिधिसभाको बैठकमा सांसद डाँगीले विश्वमा प्रविधिले फड्को मरिरहँदा हाम्रो सरकारले भने केही लाख आवेदनको डाटा पनि सुरक्षित राख्न नसकेको भनी आलोचना गरिन् । 

‘लोक सेवा आयोगजस्तो जिम्मेवार निकायले डाटा सुरक्षित नराख्नु, डाटा रिकभर गर्न नसक्नु र आन्तिममा आएर पुनः फारम भर्न लगाउने, कति सम्मको लापरबाही हो ?’ उनले प्रश्न गरिन् । डाटा रिकभर हुने नदेखिएको भन्दै उनले सुरक्षाको जिम्मेवार निकायमा बसेकालाई कारबाही गर्न माग गरिनु । साथै आयोगले लिने परीक्षाको मिति सरिरहने समस्याको अन्त्य गर्न पनि माग गरिन्।