यो व्यवस्था रहँदासम्म समृद्धि संभव छैन : साह

२६ वैशाख, काठमाडौं । आम जनता पार्टी (आजपा)का अध्यक्ष एवं सांसद प्रभु साहले अहिलेकै व्यवस्था कायम रहँदासम्म देश र जनताले समृद्धि हासिल गर्न नसक्ने ठोकुवा गरेका छन् । 

मंगलबार प्रतिनिधिसभाको बैठकमा विशेष समयमा बोल्दै बैंकको ९० प्रतिशत लगानी कृषि क्षेत्रभन्दा बाहिर भएको भन्दै किसानको उद्धार नभएसम्म देशको आर्थिक अवस्था उकास्न नसक्ने बताए । उनले यही व्यवस्थाका कारण किसानलाई बैंक लगानी र बजेट पुग्न नसकेको बताउँदै व्यवस्था कायम रहेसम्म किसान वा जनताले सही नेतृत्व चयन नसक्ने जिकिर गरे । 

सही नेतृत्व चयन गर्ने अधिकार जनतालाई दिन, विकास कार्यक्रमलाई श्रमजीवि वर्गसम्म पुर्याउन र भ्रष्टाचारलाई निर्मूल पार्न व्यवस्था परिवर्तनको विकल्प नरहेको बताए । वर्तमान व्यवस्थाबाट किसानलाई केके सुविधा दिन सक्छौं भन्नेबारे छलफल गर्न तयार छ भन्ने प्रश्नन गरे । 

अर्थमन्त्री प्रकाशशरण महतले आइतबार पेस गरेको ‘आगामी बजेटको सिद्धान्त र प्राथमिकता’माथि टिप्पणी गर्दै सांसद साहले भने, ‘के हामी किसानलाई कार्ड वितरण गर्न तयार छौं, के हामी बैंकको लगानीको ५० प्रतिशत कृषिमा दिन तयार छौं ।’

उनले वर्तमान राज्यप्रणालीमा परिवर्तन नगरेसम्म समृद्धिको कल्पना गर्नु व्यर्थ हुने बताए । राजनीतिक नेतृत्वको सक्रियता र हिमचिमले नक्कली भूटानी शरणार्थी प्रकरण सही विन्दूमा पुगेर टुंगिनेमा आशंका व्यक्त गरे ।