सामाजिक सुरक्षा भत्ता कटौती नहुने अर्थमन्त्रीको स्पष्टोक्ति

२६ वैशाख, काठमाडौं । अर्थमन्त्री डा. प्रकाशशरण महतले वितरण भइरहेको सामाजिक सुरक्षा भत्ता कटौती हुने हल्लामा सत्यता नरहेको बताएका छन् ।

आज राष्ट्रियसभामा बजेटका सिद्धान्त र प्राथमिकतामाथि उठेका प्रश्नहरुको जवाफ दिँदै मन्त्री महतले सरकारले यो वर्षको बजेटमा सुरक्षा भत्ता कटौनी नहुने स्पष्ट पारे । 

‘सामाजिक सुरक्षाका विषयमा केही आशंका र हल्ला चलेका छन्, तर हामीले प्रतिवद्धता गरेका सामाजिक सुरक्षाका विषय कटौती हुँदैन’ उनले भने । ठूला परियोजना संचालनमा भने केही कटौती हुन सक्ने संकेत दिएका छन् । 

सरकारको सम्पूर्ण ध्यान मितव्ययितातर्फ केन्द्रित हुने र साधारण खर्च घटाउन केन्द्रित हुने पनि बताउँदै अनावश्यक संरचना घटाउने र पुँजीगत खर्च प्रभावकारी बनाउनेतिर हुने बताए । 

महतले अर्थतन्त्रमा देखिएका समस्या सकेसम्म यही आर्थिक वर्षभित्र सुधार गर्ने र यसमा सबै पक्षको सहयोग आवश्यक पर्ने बताए । नेपाल राष्ट्र बैंक्ले मौद्रिक नीतिमार्फत ब्याजदर घटाउने जानकारी समेत उनले दिए ।