प्रदीप पौडेलको प्रश्न : ‘सरकारको काम काठमाडौंका पिच सडक भत्काउने मात्रै हो ?’

२६ वैशाख, काठमाडौं । नेपाली कांग्रेसका सांसद प्रदीप पौडेलले काठमाडौंका अधिकांश पिच सडक वर्षमा ४ पटकसम्म भत्काउने गरिएको भन्दै सरकारको कार्यशैलीमाथि प्रश्न गरेका छन् । 

प्रतिनिधि सभाको आजको बैठकको शून्य समयमा बोल्दै सांसद पौडेलले काठमाडौंका धेरैजसो सडक अलपत्र रहेको र पिच भएका पनि पटकपटक भत्काउने काम भएको बताए ।

खानेपानीका पाइप बिछ्याउने, बिजुलीका तार भूमिगत गर्ने त कहिले ढल व्यवस्थापनको नाममा सडक बारम्बार भत्काउने गरिएको भन्दै उनले भत्काएर अलपत्र छाड्नेलाई कारवाही गर्न माग गरे । बर्खाको समय सुरु हुँदा अलपत्र छाडिएका सडकका कारण यातायात मात्र भई मानिस आवतजावतमा समस्या परेको बताए । बर्खाअघि नै ती सडक मर्मत गरिसक्न सरकारको ध्यानाकर्षण गराए ।

उनले सडकसम्बन्धी काम सरकारका निकायहरुबीच समन्वय नहुँदा सर्वसाधारणले सास्ती व्यहोर्नु परिरहेको र सरकारप्रति वितृष्ण पैदा भएको बताए । 
यस्तै सडकका फुटपाथमा सामान थुपारेर मान्छे हिँडन समेत अप्ठ्यारो पार्ने र अस्तव्यस्त बनाइएकोबारे सम्बन्धित निकायको ध्यानाकर्षणा गराउँदै सामान राख्नेलाई कारवाहीको दायरामा ल्याउन माग गरे ।

‘सरकारको काम कतै बनाउँदै नबनाउने, कतै बनाएकालाई अलपत्र छाडिदिने हो कि विकासका कामलाई व्यवस्थित पनि बनाउने हो ?’ उनले प्रश्न गरे । सडकसम्बन्धी काममा स्थानीय तह, प्रदेश र केन्द्र सरकारले समन्वयमा मात्र गर्न उनले आग्रह गरे ।

साथै, कुनैपनि निकायले आफ्नो काम छिटो सकेर सकडलाई चुस्तदुरुस्त राख्ने कामबाट पछि नहटन उनले ध्यानाकर्षण गराएका छन् ।