भ्रष्टाचारविरुद्ध जनयुद्ध जस्तै नयाँ लडाइँ सुरु भयो: प्रधानमन्त्री

 २६ बैशाख, काठमाडौं । प्रधानमन्त्री पुष्पकमल दाहाल प्रचण्डले भ्रष्टाचारीविरुद्ध देशमा जनयुद्ध जस्तै नयाँ लडाइँ सुरु भएको बताएका छन् । काभ्रेपलाञ्चोकको महाभारत गाउँपालिकामा सडक तथा ग्रामीण विद्युतीकरण कार्यक्रमको आज शिलान्यास गर्दै प्रचण्डले भ्रष्टाचार नियन्त्रणका लागि आफू र पार्टीलाई जनयुद्धको जस्तै जनताको साथ चाहिएको बताए ।  

प्रधानमन्त्री प्रचण्डले भ्रष्टाचारको अन्त्यविना विकास र समृद्धि नआउने र आर्थिकसमृद्धीबिना अन्यायको अन्त्य र समाजवादको नयाँ युग सुत्रपात गर्न नसकिने बताए । यसका लागि जनताको साथ चाहिएको बताए । उनले आफूले सरकारको नेतृत्व सम्हालेदेखि नै तीन वटा शब्दलाई बढी महत्व दिएको बताउँदै अन्यायमा परेकालाई न्याय, समानता र अधिकार चाहिने बताए । सामाजिक न्याय भनेको देशमा विसंगति, विकृति र भ्रष्टाचारलाई अन्त्य गरिगरी नेपाली जनताले सुख र समृद्धिको दिन देख्न पाउनु रहेको बताए । 

उनले जनता सबैको साथ र सहयोगसहितको प्रतिबद्धता भए अबका पाँच वर्षमा एउटा रेकर्ड बनाउने सकिने विश्वास व्यक्त गरे । प्रधानमन्त्री प्रचण्डले लोडसेडिङको युगबाट विद्युत् बिक्री गर्ने युगमा आएको उल्लेख गर्दै आसन्न भारत भ्रमणमा विद्युत् बिक्री र उत्पादनका विषयमा सम्झौता हुने बताए ।