पत्रकारको मानअवअधिकार रक्षाका लागि ‘र्‍यापिड रेस्पोन्स टिम’ गठन

२६ वैशाख, काठमाडौं । राष्ट्रिय मानव अधिकार आयोगले पत्रकारको मानव अधिकार रक्षाका लागि ‘र्‍यापिड रेस्पोन्स टिम’ (आरआरटी) गठन गरेको छ ।

आररआरटीले पत्रकारहरुको मानव अधिकारमाथि हनन् हुने अवस्था आएको खण्डमा फिल्डमै गएर छानबिन गरी उनीहरुलाई मानव अधिकारको प्रत्याभूति गराउने राष्ट्रिय मानव अधिकार आयोगका अध्यक्ष तपबहादुर मगरले जानकारी दिए ।

मंगलबार काठमाडौंमा आयोजित एक कार्यक्रममा बोल्दै अध्यक्ष मगरले आयोगले प्रेस तथा अभिव्यक्ति स्वतन्त्रताको रक्षाका लागि पत्रकारहरुको पनि सुरक्षा हुनुपर्छ भन्ने मान्यताअनुसार संयन्त्र बनाएको बताए । उनका अनुसार आयोगका सदस्यको संयोजकत्वमा गठित संयन्त्रमा नेपाल पत्रकार महासंघको अध्यक्ष, नेपाल प्रहरी लगायत रहनेछन् । 

पत्रकारमाथि कुनै किसिमको थ्रेड भएको वा अप्ठ्यारो परेको बेला संयन्त्रले हरेक कोणबाट सहयोग पुर्याउने आयोगले जनाएको छ । संयन्त्रको कार्यविधि सम्बन्धित पक्षसँगको छलफलबाट तय गर्ने जनाइएको छ । 

नेपाल पत्रकार महासंघका अध्यक्ष विपुल पोखरेलले पत्रकारहरुको मानव अधिकार हनन् हुन नदिन महासंघले राष्ट्रिय मानव अधिकार आयोगसँग पनि मिलेर काम गरिरहेको बताए । दण्डहीनताको अन्त्य गर्ने विषयमा सरकार सक्रिय हुनुपर्नेमा जोड दिए ।

प्रेस काउन्सिल नेपालका अध्यक्ष बालकृष्ण बस्नेतले प्रेस तथा अभिव्यक्ति स्वतन्त्रताको हनन् हुन नदिन आफूहरुले संचार आचारसंहिता र निर्देशिका जारी गरी अनुगमनलाई तीव्रता दिइरहेको  बताए । प्रेस तथा अभिव्यक्ति स्वतन्त्रता हुनन हुन सचेत रहेको बताए ।