नक्कली आमा–बुबा बनाएर लिइएको नागरिकता खारेज

२५ वैशाख, काठमाडौं । नक्कली आमा बुबा खडा गरेर अनाधिकृत रुपमा लिइएको नागरिकतालाई जिल्ला प्रशासन कार्यालयले खारेज गरिदिएको छ । 

मन्थली नगरपालिका–७ भटौलीका राजमान तामाङ र उनकी श्रीमती एलिना तामाङलाई नक्कली बाबु र आमा बनाएर सुजु थोकर नाम गरेकी युवतीले जिल्ला प्रशासन कार्यालयबाट गएको चैतमा वंशजको नागरिकता लिएकी थिइन् । सो कुरा वडाध्यक्ष भुवनहरि प्रसाइँले थाहा पाएपछि कारवाहीमा पर्नबाट जाेगिन उनले नै  खारेजीका लागि कार्यालयमा उजुरी दिएका थिए ।

सोही आधारमा बाबु आमा र थोकरलाई बोलाएर सोधपुछ गर्दा नक्कली भएको पत्ता लागेपछि सीडीओ अनिता निरौलाले नागरिकता सोमबार खारेज गरिदिएकी हुन् । 

आफूलाई भुक्याएर नागरिकताका लागि सिफारिस गर्न गराइएको भन्दै वैशाख २० मा उजुरी दिएका थिए । सिफारिसमा आधारमा नक्कली छोरी (सुजु)ले जिल्ला प्रशासन कार्यालय रामेछापबाट गएको चैत ३० गते २१–०१–७९–०७४०२ नम्बरको नागरिकता लिएकी थिइन् ।

 सो प्रकरणमा वडा सचिव श्यामकिशोर साहलाई समेत सोधपुछ गरिएको थियो । उनले थोकरको जन्म दर्ताको प्रमाणपत्र बनाएका थिए ।
नक्कली बाबु आमा बन्ने र नागरिकता लिनेमाथि आवश्यक अनुसन्धान र कारवाहीका लागि कार्यालयले जिल्ला प्रहरी कार्यालयलाई पत्र लेखेको छ । पत्रपछि कीेर्ते कसुरमा उनीहरुमाथि प्रहरीले अनुसन्धान सुरु गरेको जनाइएको छ ।