डोल्पामा पहिलोपटक पुग्यो यात्रुवाहक बस

२७ वैशाख, काठमाडौं । नेपालको हिमाली जिल्ला डोल्पामा पहिलोपटक सार्वजनिक सेवाका यात्रुवाहक बस पुगेको छ । सोमबार बाँकेको नेपालगन्जबाट हिँडेको बस मंगलबार डोल्पा सदरमुकाम दुनै पुगेको हो । यससँगै अब डोल्पा राष्ट्रिय राजमार्गसँग पनि जोडिएको छ ।

केही महिनायता डोल्पा जाजरकोट सडकखण्डअन्तर्गत डोल्पाको भेरी नदीमा बेलिब्रिज बनेसँगै डोल्पामा बस पुगेको हो । डोल्पा राष्ट्रिय सडक सञ्जालमा जोडिएपछि पहिलो पटक भेरी राप्ती यातायात प्रालि र नमस्ते सगरमाथा यातायात प्रालिको एकएक वटा यात्रुवाहक बस डोल्पा आइपुगेको जिल्ला प्रशासन कार्यालयले डोल्पाले जनाएको छ ।

यसअघिसम्म डोल्पामा जीपमात्रै गुड्दै आएको थियो । सार्वजनिक यातायातअन्तर्गत  बस सेवा सुरु भएपछि जिल्लाबासीले खुशी व्यक्त गरेका छन् ।

अब राष्ट्रिय राजमार्गसँग जोडिन हुम्ला जिल्ला मात्र बाँकी छ । राष्ट्रिय गौरबको आयोजना कर्णाली करिडोर नेपाली सेनाले बनाइरहेका छन् । करिडोरको हुम्ला खण्डको ६ किलो मिटर सडक निर्माण तथा केही खोला पुल बन्न बाँकी छ । निर्माण सकेपछि हुम्ला पनि राष्ट्रिय राजमार्गमा जोडिनेछ ।