नक्कली भुटानी शरणार्थी प्रकरण : प्रहरी अनुसन्धानमा सघाउन रायमाझीलाई एमालेकाे निर्देशन

२७ वैशाख, काठमाडौं । नेकपा (एमाले)ले नक्कली भुटानी शरणार्थी प्रकरणमा मुछिएपछि फरार रहेका सांसद एवं पार्टी सचिव टोपबहादुर रायमाझीलाई अनुसन्धानमा प्रहरीलाई सहयोग गर्द संसदबाटै आग्रह गरेको छ । 

बुधबार प्रतिनिधिसभा बैठकमा प्रिबजेट छलफलमा भाग लिँदै एमालेका उपमहाचिव पृथ्वीसुब्बा गुरुङले रायमाझीलाई अनुसन्धानमा सहयोग गर्न आग्रह गरेका हुन् । 

एमालेले कानून र विविधको शासन मान्ने बताउँदै अनुसन्धानमा सघाउनुपर्ने उनको भनाइ थियो । ‘हाम्रो पार्टीका माननीय टोपबहादुर रायमाझीलाई हिजो सचिवालय बैठक बसेर निर्देशन गरेका छौं, तपाई यो अनुसन्धान र छानबिनमा सहयोग गर्न लाग्नुस्, सहयोग गर्नुस्’ उपमहासचिव गुरुङले भने । उनले छानबिनमा निर्दोष फस्न र दोषी उम्कन नहुनेमा पार्टी सचेत रहेको बताए ।

रायमाझी गत ४ मंसिरमा सम्पन्न आमनिर्वाचनमा अर्घाखाँचीबाट प्रतिनिधिसभा सदस्य विजयी भएका हुन् । उनले नेपाली कांग्रेसका प्रभावशाली नेतृ पुष्पा भुसाललाई पराजित गरेका थिए । तर पछिल्लो पपटक नेपालीलाई नक्कली भुटानी शरणार्थी बनाएर अमेरिका उडाउने भन्दै करौडौं रुपैयाँ रकम उठाएर ठगी गरेको भनिएको प्रकरणमा संलग्नता देखिएको भन्दै प्रहरीले जिल्ला अदालतबाट पक्राउ पूर्जी लिएर पक्राउको तयारी गरिरहेको बेला गत बुधबार साँझबाट गायब छन् । सोही प्रकरणमा उनका छोरा सन्दीपसहित १२ जना पक्राउ परिसकेका छन् । 

आज बिहान मात्र नेपाली कांग्रेसका नेता समेत रहेका पूर्वगृहमन्त्री बालकृष्ण खाण, उनका स्वकीय सचिव नरेन्द्र केसी काठमाडौंबाट पक्राउ परेका छन् । उनीहरुलाई आजै म्याद थपका लागि अदालतमा पेस गर्ने भएको छ ।