भेटघाट वा छलफलले नक्कली भुटानी शरणार्थी प्रकरण सामसुम नहोस्  ः महामन्त्री थापा

२७ वैशाख, काठमाडौं । नेपाली कांग्रेसका महामन्त्री तथा सांसद गगनकुमार थापाले नक्कली भुटानी शरणार्थी छानबिन प्रकरण नेताहरुको भेटघाट र छलफलले सामसुम हुन नहुने बताएका छन् । 

बुधबारको प्रतिनिधि सभा बैठकमा बोल्नुहुँदै महामन्त्री थापाले नक्कली भुटानी शरणार्थी प्रकरणमा कुनैपनि राजनीतिक भेटघाटले प्रभाव पार्नु नहुने बताए । प्रकरणमा संलग्न जुनसुकै दलको जुनसुकै ओहोदाको व्यक्ति भएपनि कारबाही हुनुपर्ने बताउँदै बजारको हल्लाले अनुसन्धान प्रभावित हुनुनहुने बताए । 
‘‘कुनै दबाबले प्रभावित नहोस् । कुनै प्रभावले कहीँबाट प्रभावित नहोस् । मेरो आग्रह छ, अनुसन्धान फ्रि र फेयर होस् । निर्दोष कोही पनि नपरोस् । तर दोषी छ भने नेता होस् कि, नाता होस् । एउटा पनि नछुटोस्’ उनले भने । 

प्रकरणमा सरकारले दह्रोसँग खुट्टा टेकेर नागरिकलाई विश्वास लाग्ने ढंगले टुंगोमा पुर्याउन सके सुशासनको नारा साकार हुने बताए । उनले भने ‘तपाईको फिल्म चल्छ । हाउसफुल हुन्छ । नभए हल खालि हुन्छ । सबैले हेरेको छ, यहाँ अनुसन्धान गरे भनेर मात्र हुँदैन अब । विश्वास लाग्नुपर्छ । नागरिकलाई फ्रि र फेयर भयो भन्ने विश्वास लाग्नुपर्छ ।’’