फरार रहेका रायमाझीले आज साँझ प्रहरीसमक्ष आत्मसमर्पण गर्ने

२७ वैशाख, काठमाडौँ । नक्कली भुटानी शरणार्थी प्रकरणमा पक्राउ पुर्जी जारी भएपछि फरार रहेका एमाले सांसद टाेपबहादुर रायमाझीले बुधबार साँझ साढे ५ बजे प्रहरी समक्ष आत्मसमर्पण गर्ने भएका छन् । रायमाझीलाई एमालेले सचिव पदबाट निलम्बन गरिसकेको छ । 

रायमाझीले उनको फेसबुकमार्फत आत्मसमर्पण गर्ने जनाएका छन् । रायमाझीले उनको फेसबुक पेजमा स्वास्थ्य अवस्था ठीक नभएका कारण अस्पतालमा उपचार गराइरहेको बताएका छन् । उनले नेपालीलाई नक्कली शरणार्थी ठगी प्रकरणमा आफ्नो नाम मुछिएको भन्दै आपत्ति पनि जनाएका छन् । 

उनले शरणार्थी ठगी प्रकरणमा आफू दोषी नभएको भन्दै जुनसुकै तरहबाट पनि निर्दोष सावित गर्ने दावी गरेका छन् । यो प्रकरणको अनुसन्धानमा सघाउन आफु वेलुका साढे ५ बजे प्रहरी समक्ष उपस्थित हुन्छु भनेका छन् । उनले आजै संसद सचिवालयलाई बिरामी परेको पत्र पनि पठाएका छन् । संघीय संसद सचिवालयले रायमाझीले बिरामी भएको पत्र पठाएको र सभामुखलाई जानकारी गराइएको जानकारी दिएको छ ।