ठगीका आरोपी पूर्वगृहमन्त्री खाँणलाई ४ दिन हिरासतमा राखिने

२७ वैशाख, काठमाडौं । नक्कली भुटानी शरणार्थी बनाई सर्वसाधारणसँग ठगी गरेको आरोपमा आज बिहान पक्राउ परेका आरोपी पूर्वगृहमन्त्री बालकृष्ण खाँणलाई अनुसन्धानका लागि हिरासतमा राख्न प्रहरीले ४ दिन म्याद पाएको छ । 

निवासबाट पक्राउ गरी अनुसन्धान गर्नका लागि अनुमति लिन बुधबार दिउँसो उनलाई प्रहरीले काठमाडौं जिल्ला अदालतमा पेस गरेको हो । प्रकरणमा अनुसन्धान गर्न अदालतले ४ दिनको म्याद दिएको महान्यायाधिवक्ता दीनमणि पोखरेलले बताए । 

खाणसँग जिल्ला प्रहरी परिसर काठमाडौंमा अनुसन्धान अधिकृतले लामो बयान लिएका छन् । प्रहरीले खाँणको स्वास्थ्य परीक्षण समेत गराएको छ । प्रकरणमा आजै पक्राउ परेका खाँणका सहयोगी नरेन्द्र केसीलाई हिरासतमा राखेर अनुसन्धान गर्न अदालतले म्याद थप गरेको छ । 

प्रकरणमा अहिलेसम्म १२ जना पक्राउ परिसकेका छन् । अन्य फरार ३ जनामध्ये एमाले सांसद टाेपबहादुर रायमाझीले आजै आत्मसमर्पण गर्ने चर्चा छ ।