तीन नेताबीच प्रहरी अनुसन्धानलाई सघाउने सहमति भयोः प्रधानमन्त्री

२७ वैशाख, काठमाडौं । प्रधानमन्त्री पुष्पकमल दाहाल प्रचण्डले तीन दलका तीन शीर्ष नेताबीच भुटानी शरणार्थी प्रकरणमा सुरु भएको अनुसन्धानमा नेपाल प्रहरीलाई सघाएर जाने सहमति भएको बताएका छन् । उनले यो प्रकरणलाई कही कतैबाट निस्तेज पार्ने काम हुन्छ कि भन्ने कुनै आशंका गर्नुपर्ने कारण नभएको बताएका छन् ।   

सिंहदरबारमा बुधबार भएको तीन दलको बैठकपछि पत्रकारहरुसँग प्रतिक्रिया दिँदै प्रधानमन्त्री प्रचण्डले आफूहरुबीच स्पष्ट भाषामा दोषी नछुटून् र निर्दोष नपरून् भन्ने विषयमा सहमति रहेको बताए । प्रहरीले आफ्नो काम गरिरहेको भन्दै उनले जे भइरहेको छ नियम र विधि पद्धतिअनुसार काम भइरहेको र प्रहरीको अनुसन्धानमा कुनै डिस्टर्ब गर्नुहुन्न भन्नेमा सबैको सहमति रहेको बताए । 

उनले मिडियामा प्रचार भएजसरी हामी तीन दलका शीर्ष नेताहरुको भेट नभएको उनको भनाइ छ । उनले सदन कसरी अगाडी बढाउने समितिहरु कसरी बनाउने विषयमा छलफल मात्रै भएको बताए । प्रचण्डले मिडियामा प्रचार भएजसरी तीन जनाको भेट भएको नभइ सदन कसरी अगाडि बढाउने र समितिहरू कसरी बनाउने भन्नेबारे पनि छलफल भएको जानकारी दिए ।