२८ लाख बराबर मूल्यको चौंरी गाईको पुच्छरसहित ४ जना पक्राउ

२७ वैशाख, काठमाडौं । महोत्तरी प्रहरीले दर्जनौं संख्यामा चौंरी गाईको पुच्छसहित ४ जनालाई पक्राउ गरेको छ । जिल्लाको जलेश्वर नगरपालिका-३ स्थित मलिवाडा बसपार्कबाट बुधबार दिउँसाे सशस्त्र प्रहरी बलले ५ सय ५६ वटा चौ‌री गाईको पुच्छरसहित ४ जनालाई पक्राउ गरेको हो । 

पक्राउ पर्नेहरुमा सोही ठाउँ बस्ने विकास कुमार महत्तो, धादिङ्ग जिल्लाको गजुरी गाउँपालिका ८ बस्ने ३६ वर्षीय उमेशबहादु्र बस्नेत, बारा जिल्लाको सिमरा नगरपालिका १ बस्ने ६० वर्षीय सुमन मान्नधर र धनुषा जिल्लाको हसपुर नगरपालिका ४ बस्ने ३७ वर्षीय मोहमद अजिन छन् ।

उनीहरुलाई काठमाडौंबाट जलेश्वर हुँदै मलिवाडा रुटमा चल्ने प्रदेश २–०३–००१ ख १२१५ नम्बरको साबित्री ट्राभल्सकाे यात्रुवाहक बसबाट मलिवाडा बसपार्कमा करिब २८ लाख ३० हजार रुपैयाँ बराबरकोे चौंरी गाईको पुच्छर निकाली ठेलामा राख्ने क्रममा सशस्त्र प्रहरी बल नेपाल नम्बर ९ गण महोत्तरीले नियन्त्रणमा लिएको हो ।

नियन्त्रणमा लिइएका बस र पक्राउ परेका अभियुक्तलाई चौरी गाईको पुच्छरसहित आवश्यक कारबाहीको लागि सशस्त्र वन सुरक्षा शाखा माईस्थान महोत्तरीमा बुझाइएको छ।