नक्कली भुटानी शरणार्थी प्रकरण मानव तस्करी भएकाे एकीकृत समाजवादीकाे निष्कर्ष

२७ वेशाख, काठमाडौं । सत्तारुढ दल नेकपा (एकीकृत समाजवादी)ले नक्कली भुटानी शरणार्थी प्रकरण मानव तस्करी भएको निष्कर्ष निकालेको छ । 
बुधबार बसेको पार्टीको सचिवालय बैठकले कुनै दबाब वा प्रभावबाट यो काण्डको अनुसन्धान र कारबाही प्रक्रिया कमजोर नतुल्याउन समेत सरकारको ध्यानाकर्षण गराएको छ । 

बैठकले नक्कली शरणार्थी बनाएर नेपालीलाई अमेरिका पठाउने र त्यसनिम्ति पैसा असुलेको घटना आर्थिक अनियमिततामात्रै नभएर मानव तस्करी भएको निष्कर्ष निकालेको महासचिव घनश्याम भुसालले जानकारी दिए । विगतका यस्तै प्रकृतिका घटनाहरु भएका र यो पटक पनि प्रकरणमाथि अनुसन्धानलाई नाजायज प्रभाव पार्ने किसिमका ‘दौडधुप’ समेत सुरु भएको भन्दै त्यसबाट अनुसन्धान प्रभावित हुन नदिने पार्टीले खबरदारी गर्ने उनले बताएका छन् । 

‘विगतमा यस्ता कैयन् घटनाहरू स्थार्थ समूहका दबाबका कारणले ढाकछोप भएका छन् । तसर्थ, कुनै पनि शक्तिले कुनै पनि बहानामा पार्ने कुनै पनि दबाब वा प्रभावबाट यो काण्डको अनुसन्धान र कार्यवाही प्रक्रिया कमजोर हुन नजाओस्’ भुसालद्वारा आज जारी विज्ञप्तिमा उल्लेख छ । 

बैठकले नक्कली भुटानी शरणार्थी प्रकरणलाई प्रभावित हुन नदिन र टुंगोमा पुर्याई दोषीलाई कारवाहीको दायरामा उपुर्याने काममा सहयोगका लागि क्रियाशील हुन पार्टी पंक्तिलाई निर्देशन दिएको जनाइएको छ ।

एकीकृत समाजवादीका सांसदहरुले संसद बैठकमा नक्कली शरणार्थी प्रकरणमा तत्कालीन प्रधानमन्त्री रहेका एमाले अध्यक्ष केपी शर्मा ओली र गृहमन्त्री रामबहादुर थापा ‘बादल’लाई समेत अनुसन्धानमा ल्याउन माग गर्दै आएका छन् ।