धादिङको गल्छीमा छुरा प्रहार गरी एक युवकको हत्या, स्थानीयले गरे राजमार्ग अवरूद्ध

२८ वैशाख, काठमाडौं । धादिङमा छुरा प्रहार गरी एक युवकको निर्मम हत्या गरिएको छ । गल्छी गाउँपालिका–८ गल्छी नजिकै निबुवा बोटेमा सञ्चालित एक होटलमा खाजा खान आएका ग्राहक २७ वर्षीय विनोद थापामगरको छुरा प्रहारबाट हत्या भएको प्रहरीले जनाएको छ । 

बुधबार साँझा निबुवा बोटेस्थित ‘सानदार होटल’का सञ्चालक २८ वर्षीय नीरज पण्डितले छुरा प्रहार गरी थापामगरको अत्या गरेको पाइएको छ । पण्डितलाई घटनालगत्तै पक्राउ गरिएको छ । उनकी आमा सरस्वती र अन्य ५ जनालाई पनि अनुसन्धानका लागि पक्राउ गरिएको छ ।

खाजा खाएपछि होटल सञ्चालकसित पैसा तिर्नेबेला भनाभन भएको र त्यो क्रम झगडामा परिणत भएपछि हतियार प्रहारसम्म पुगेको बताइएको छ । घाइते मगरलाई उद्धार गरी काठमाडौंको नर्भिक अस्पतालमा ल्याएर उपचार गराइरहेको बेला मृत्यु भएको जनाइएको छ । उनकाे पेट र काेखामा गहिराे चाेट लागेकाे बताइन्छ ।

घटनाबारे थप अनुसन्धान भइरहेको जिल्ला प्रहरी कार्यालयका सूचना अधिकारी इन्स्पेक्टर धर्मजित थिङले जानकारी दिएका छन् । हत्यारालाई कारवाहीको माग गर्दै पीडित र स्थानीयवासीले गल्छी–त्रिशूली सडकखण्ड गएरातिदेखि नै अवरुद्ध गराएका छन् । यसबाट गल्छी हुँदै नुवाकोटतर्फ जाने–आउने सवारीसाधन ठप्प छ ।