दैलेख आगलागीका घाइतेमध्ये एक जनाको मृत्यु

२८ वैशाख, काठमाडौं । दैलेखको आठबीस नगरपालिका–६ स्थित माल्या जङ्गलमा बुधबार आगलागीमा परी घाइते भएका थप एकजनाको मृत्यु भएको छ ।

आगलागीमा परी गम्भीर घाइते स्थानीय ५५ वर्षीय भैरव विकको उपचारका क्रममा गएराति बाँकेको नेपालगन्जस्थित भेरी अस्पतालमा मृत्यु भएको हो । 
भेरी अस्पतालमा उपचारका लागि ल्याइएका ४ जनामध्ये विकको शरीरको अत्यधिक भाग जलेको र उनलाई बचाउन नसकिएको अस्पतालका प्रमुख मेडिकल सुपेरिटेन्डेन्ट डा. बद्री चापागाईंले बताए ।

अन्य घाइते आठबीस–६ का ३२ वर्षीया नैनी कामी, ३३ वर्षीय नवीन विक र २९ वर्षीय प्रजा विकको उपचार भइरहेको छ । तिमध्ये एक जनाको अवस्था गम्भीर रहेको जनाइएको छ । 

घाइते अन्य चार घाइतेको नेपालगन्ज मेडिकल कलेजको शिक्षण अस्पतालमा उपचार भइरहेको छ । गम्भीर घाइतेलाई थप उपचारका लागि काठमाडौँ लैजाने तयारी भइरहेको डा। चापागाईंले बताए ।