गभर्नर अधिकारीले वाणिज्य बैंकका सिईओहरुसँग छलफल गर्दै

२८ वैशाख, काठमाडौं । नेपाल राष्ट्र बैंकका गभर्नर महाप्रसाद अधिकारीले वाणिज्य बैंकका सिईओहरुसँग आज छलफल गर्दैछन् । गर्भनर अधिकारीले सिईओहरुसँग नक्सालस्थित मारियट होटलमा  ‘लञ्च मिडिङ’ बोलाएको बताइएको छ । 

राष्ट्र बैंकले मौद्रिक नीति समीक्षाको तयारी गरिरहेको बेला बोलाइएको ‘लञ्च मिटिङ’लाई अर्थपूर्ण रुपमा हेरिएको छ । राष्ट्र बैंकले चाल आवको तेस्रो त्रैमासिक समीक्षामा केही नीतिगत परिवर्तन गर्ने तयारी गरिरहेको छ । 

मौद्रिक नीति समीक्षामा बैंकको निक्षेप र कर्जा ब्याज घटाउनुपर्ने दबाब राष्ट्र बैंकमाथि छ । अर्थमन्त्री प्रकाशशरण महतले संसदको दुवै सदनमा पेस गरेको ‘विनियोजन विधयेकका सिद्धान्त र प्राथमिता’ प्रस्तावमाथि छलफलमा भाग लिएका अधिकांश सांसदहरुले बैंकको ब्याजदर घटाएर ऋणीलाई सहुलियत दिनुपर्ने र घरजग्गाको कारोबारलाई खुला गर्दै लैजान सुझाव दिएका छन् ।