परीक्षा हलबाट निकालिएकी मेडिकल विद्यार्थीले गरिन् ‘आत्महत्या’

२८ वैशाख, काठमाडौं । चितवन मेडिकल कलेजकी एक छात्राले ‘आत्महत्या’ गरेकी छिन् । बीडीएस चौथो वर्षकाे पहिलाे सेमेष्टरमा अध्ययनरत पाेखराकी २१ वर्षीया सिम्रन थापाले ‘आत्महत्या’ गरेकी हुन् ।

परीक्षा दिइरहेको समयमा उनलाई बुधवार बिहान ११ बजेतिर शिक्षकले परीक्षा हलबाट निकालेका थिए । निकालिएपछि उनलाई केही समयपछि नै आफ्नै  कोठामा सलकाे पासाेमा झुन्डिएर ‘आत्महत्या’ गरेकाे दाबी कलेजले गरेकाे छ । निकालिएकाे करिब २ घण्टापछि उनलाइ मृत फेला परेकी थिइन् ।

अपममानको महसुस र तनावका कारण ‘आत्महत्या’ गरेको हुनसक्ने अनुमान गरिएको छ । उक्त घटनाको निष्पक्ष छानबिन गरी दोषी शिक्षकमाथि कारबाहीको माग गर्दै विद्यार्थीहरू आन्दोलित बनेका छन् । आन्दोलनमा विद्यार्थी संगठनहरुले समर्थन गरेका छन् । 

अखिल नेपाल राष्ट्रिय स्वतन्त्र विद्यार्थी युनियन चिकित्सा विद्यार्थी राष्ट्रिय कमिटीका अध्यक्ष पुष्पराज भामले एक विज्ञप्ति जारी गर्दै मेडिकल कलेजहरूमा विभिन्न वाहनामा दिइने मानसिक तनावकै कारण विद्यार्थी ज्यान फाल्ने तहसम्म पुग्न विवश भएको जनाउँदै विरोध गरेका छन् । 

दोषीलाई तत्काली पक्राउ गरी अनुसन्धान गर्न माग गर्दै उनले शिक्षकले विद्यार्थीहरूलाई हेप्ने, तुच्छ शब्दमा गाली गर्ने, समान्य त्रुटीमा पनि चरम मानसिक तनाव दिने र यातना दिने कार्य बन्द गर्न माग गरेका छन् । 

चिकित्सा शिक्षा संघर्ष अभियानले समेत घटनाको विरोध जनाउँदै घटनाको सत्यतथ्य बाहिर ल्याएर दोषीलाई कारवाही गर्नमाग गरेको छ । अभियानले विज्ञप्ति जारी गर्दै चितवन मेडिकल कलेजमा निरन्तर कलेज प्रशासनबाट विद्यार्थीहरूलाई गरिने व्यवहार एकदम अपमानजनक र खेदजनक रहेको जनाउँदै घटनाको निष्पक्ष छानबिन गर्दै दोषीमाथि कारबाही गर्न माग गरेको छ ।

आन्दोलनरत सहपाठीहरूले मृतक थापाले अध्ययनका क्रममा कलेमा बुझाएकाे शुल्क परिवारलाई पफिर्ता हुनुपर्ने माग गरेका छन् । बीडीएसका विद्यार्थीमाथि कलेजमाबाट हुने हैरानी र अपमानजनक व्यवहार बन्द हुनुपर्ने माग अघि सारेका छन् ।

विद्यार्थीमाथि हुने शारीरिक र मानसिक यातनाका विरुद्धमा विगतदेखि नै आवाज उठाउँदै आएको तर, त्यस्ता घटना बारम्बार दोहोरिने गरेको ठहर अभियानको छ । घटनालाई भित्र भित्रै लुकाउन खोज्ने, गलत व्यक्तिलाई ढाकछोप गर्ने, पीडित परिवार र विद्यार्थीलाई धम्की दिने र घटनाको छानबिन प्रक्रियामा चलखेल सुरु भएको भन्दै सचेत रहन अपिल समेत गरिएको छ ।