जेठ महिनामा निक्षेपको ब्याजदर स्थिर रहने, कर्जामा ब्याज नघट्ने संकेत

२८ वैशाख, काठमाडौं । बैंकहरुले जेठ महिनामा निक्षेपको ब्याजदर स्थिर राख्ने भएको छ । वाणिज्य बैंकहरुको संगठन नेपाल बैंकर्स संघको बिहीबार बसको बैठकले बैंशाख महिनाको निक्षेपको ब्याजदर जेठमा कायम राख्ने निर्णय गरेको हो । 

चैत अन्तिम साता बसेको बैंकर्स संघको बैठकले निक्षेपको ब्याजदर ११ प्रतिशतबाट ९.९९ प्रतिशतमा झारेको थियो । त्यसयता निक्षेप संकलन केही सुस्ताएको छ । निक्षेप निरुत्साहित हुने संभावना बढेपछि बैंकरहरु ब्याजदर नघटाउने निर्णयमा पुगेका हुन् ।

यसरी निक्षेप ब्याजदर कायमै राख्ने निर्णय गरेर बैंकहरूले कर्जाको ब्याज दर पनि नचलाउने अर्थात नघटाउने संकेत दिएको छ ।

सरकारले भने बैंकहरुको नियमक निकाय नेपाल राष्ट्र बैंकलाई अबको मौद्रिक नीतिको समीक्षबाट बैंकहरुको ब्याज दर घटाउन दबाब दिँदै आएको छ । राष्ट्र बैंकले चालु आवको ते्रस्रो त्रैमासिक मौद्रिक नीति समीक्षा यसै हप्ता गर्ने तयारी गरेको छ । 

बैंकहरुले निक्षेपमा दिइने ब्याजदर स्थिर राख्ने भएपछि सरकारले कर्जाको ब्याज दर घटाएर ऋणी उद्योगी–व्यवसायीलाई दिन खोजेको सहुलियतको आश्वसनमा धक्का पुगने देखिएको छ ।