ओलीको राजनीतिक प्रतिवेदन : ‘माओवादी केन्द्र अवसरवादी र अस्थिर’

२८ वैशाख, काठमाडौं । नेकपा (एमाले)का अध्यक्ष केपी शर्मा ओलीले पार्टीको आजदेखि ३ दिनसम्म चल्ने केन्द्रीय समिति बैठकमा सरकारको नेतृत्व गरिरहेको नेकपा (माओवादी केन्द्र)को चर्को आलोचना गरेका छन् । 

उनले बैठकमा सदस्यहरुलाई वितरित राजनीतिक प्रतिवेदनमा माओवादी केन्द्र अवसरवादी, अविश्वसनीय र अस्थिर चरित्र बोकेको दल भएको खरो टिप्पणी गरेका हुन् । प्रतिवेदनको बुँदा नम्बर २ मा ‘नयाँ कोर्स निर्माणको प्रयास’ शीर्षकअन्तर्गत समेटिएको धारणामा माओवादी केन्द्र आफैं चरम अवसरवादबाट ग्रष्त र विभिन्न शक्ति केन्द्रहरुको प्रभाव पर्ने गरेको र दक्षिणपन्थी अवसरवादको ओरालो यात्रामा लागेको उल्लेख गरेका छन् । 

उनले २०७८ असारमा सर्वोच्च अदालतबो परमादेशबाट बनेको गलत कोर्सलाई २०७९ पुष १० मा एमाले र माओवादी केन्द्रसहित दलहरुको सहमतिमा माओवादी केन्द्रका अध्यक्षलाई प्रधानमन्त्री बनाएको र तर दक्षिणपन्थी अवसरवाद लाग्ने क्रम नरोकिएपछि एमाले–माओवादी केन्द्रसहितको गठबन्धन फुटेको उनको तर्क छ । गएको ६ वर्षमा एमालेमाथि पकपटक धोका भएको उल्लेख गरेका छन् ।

‘सर्वोच्च अदालतको परमादेशलाई सच्याउन पुष्पकमल दाहाल ‘प्रचण्ड’लाई प्रधानमन्त्री बनाएको बताएका छन्। लाई दक्षिणपन्थी अवसरवादी ओरालो यात्राबाट रोक्न सकिएन,’ प्रतिवेदनमा भनिएको छ, ‘राष्ट्रपति निर्वाचनसम्म आइपुग्दा ऊ नेपाली कांग्रेससँग समर्पण गर्न पुग्यो। माओवादी केन्द्रबाट प्रदर्शित यस राजनीतिक बेइमानी, चरम अस्थिरता र नांगो अवसरवादले राष्ट्रिय राजनीतिलाई पुरानै विन्दुमा धकेलेको छ ।’

पुष १० मा एमालेसहित ७ दलको समर्थनमा प्रचण्ड प्रधानमन्त्री बनेपछि फागुन २६ मा भएको राष्ट्रपति निर्वाचन कांग्रेसका उम्मेदवार रामचन्द्र पौडेललाई माओवादी केन्द्रले मत दिएर विजयी बनाए लगत्तै एमाले सरकारबाट बाहिरिनुपर्ने अवस्था बन्यो र ऊ अहिले प्रमुख प्रतिपक्षमा पुगेको छ । कतिपय राजनीतिक विश्लेषहरुले ओलीको प्रतिवेदन सत्ताच्युत हुँदाको आक्रोश र पीडाको रुपमा टिप्पणी गरेका छन् ।

प्रतिवेदनमाथि भोलिदेखि केन्द्रीय सदस्यहरुले धारणा राख्ने क्रम सुरु हुने जनाइएको छ । बैठक आगामी शनिबारसम्म चल्नेछ ।