बाबुराम भट्टराईले भने- ‘नागरिकलाई शरणार्थी बनाएर विदेश पठाउनु मानवतस्करी हाे’

२८ वैशाख, काठमाडौं । पूर्वप्रधानमन्त्री समेत रहेका नेपाल समाजवादी पार्टीका अध्यक्ष डा. बाबुराम भट्टराईले नेपाली नागरिकलाई नक्कली भुटानी शरणार्थी बनाएर विदेश पठाउने कार्य मानव तस्करीको निकृष्टतम् अपराध भएको बताएका छन् । 

उनले बिहीबार प्रेस विज्ञप्ति जारी गर्दै काण्डका अपराधी पत्ता लगाएर कारवाही गर्न निष्पक्ष अनुसन्धान गर्न माग गरेका छन् । निष्कर्ष नपुगेसम्म अनुसन्धान नरोक्ने उनले आग्रह गरे । प्रकरणमा सरकारले र प्रहरी प्रशासनले देखाएको अग्रसरताको उनले प्रशंसा गरेका छन् । 

विज्ञप्तिमा भनिएको छ, ‘आफ्नै देशको नागरिकलाई अनागरिक बनाएर विदेशमा मानव तस्करी गर्नु र त्यस निम्ति राज्यको उच्च तहमा रहेकाहरूले नै निजी लाभका निम्ति राज्य शक्तिको चरम दुरूपयोग गर्नु निकृष्टतम अपराध हो ।’ अनुसन्धानलाइ प्रभावित हुन नदिन आफ्नो पार्टीले निरन्तर खरबदारी गर्ने बताए । 

दाेषीलाई मानव तस्करीकाे मुद्दा पनि चलाउनु पर्ने बताएका छन् । उनले राज्यशक्तिको दुरुपयोगले जनतामा निराश, आक्रोश र विद्रोहभाव बढ्दै गइरहेको औल्याएका छन् ।