भुटानी शरणार्थी प्रकरणबारे संसदमा बोल्न ‘प्रमाण’ जुटाउँदै ओली

२८ वैशाख, काठमाडौं । नेकपा (एमाले)का अध्यक्ष केपी शर्मा ओली यतिखेर नक्कली भुटानी शरणार्थी प्रकरणबारे संसदमा बोल्न ‘प्रमाण’ जुटाउने काममा लागिरहेका छन् । 

उनले आजबाट सुरु भएको पार्टीको केन्द्रीय समितिको बैठकमा सम्बोधन गर्दै प्रकरणको सुरुवाती आफू प्रधानमन्त्री भएको बेलामै भएको कुरा अहिले मात्र थाहा भएको बताए । मन्त्रीस्तरीय निर्णय प्रधानमन्त्रीलाई थाहा नहुने दृष्टान्त थुप्रै भएको जिकिर समेत गरे । 

बैठकको  प्रारम्भमा राजनीतिक घटनाबारे सहभागीहरुलाई संक्षिप्तमा जानकारी दिँदै प्रकरणमा पार्टीका निलम्बित सचिव टोपबहादुर रायमाझीको संलग्नताको स्तर कति भन्ने प्रहरीबाट थाहा लाग्ने बताउँदै शरणार्थी प्रकरणमा कहिले, कोबाट, केसम्म भएको थियो ? भन्नेबारे आगामी जेठ ४ गते संसद बैठकमा विस्तृत रुपमा बताउने जानकारी गराए । 

प्रकरणमा सरकारले विपक्षीलाई तह लगाउने अस्त्रको रुपमा अगाडि बढाएको उनको आरोप थियो । उनले प्रकरणबारे अहिले धेरै नबोल्ने, संसद बैठकमै सबै कुरा खुलस्त गर्ने बताए । उनले यसो भन्दा सहभागीहरुले ताली बजाए । प्रकरणमा मुछिएपछि एमालेले केन्द्रीय सचिव रायमाझीलाई अनुसन्धान टुंगो नलागेसम्मका लागि बुधबार मात्र निलम्बन गरेको छ । उनलाई प्रहरीले पक्राउका लागि व्यापक खोजी गरिरहेको छ । 

टोपबहादुरले बुधबार नै प्रहरी कार्यालयमा हाजिर हुन लागेको चर्चाबारे उनले बैठकमा भने, ‘टोपबहादुर जीले प्रहरीमा हिजै हाजिर हुने भन्ने कुरा मैले प्रहरीबाटै बुझ्या हो । तर आजसम्म भएको देखिँदैन ।’

ओलीले बैठकमा बोल्ने क्रममा प्रकरणमा अनुसन्धानका लागि पक्राउ परेका अभियुक्तहरुलाई भेटन गएका नेपाली कांग्रेस रामेछापका नेता आङटावा शेर्पा र अभियुक्तलाई छुट्टै कोठामा राखेर घण्टौं कुराकानी गराएको आरोप समेत लगाए । कुराकानीपछि अभियुक्तको बयान फेर्न लगाइएको तर्क समेत गरे ।

प्रकरणलाई एमालेविरुद्ध प्रहारको हतियारको रुपमा कसरी प्रयोग  गरिरहेको छ ? भन्ने कुरा संसदमा राख्नै पर्ने अवस्था सरकारले बनाइरहेको उनको भनाइ थियो । प्रकरणलाई टुंगोमा पुर्याउन एमालेले सहयोग गर्ने बताउँदै उनले भुटानी शरणार्थी कसरी सिर्जना गरिएको थियो र हालसम्म के के भए, ककसले केसम्मन गरे भन्ने कुरा प्रमाणसहित खुलस्त गर्दै जाने उनको भनाइ थियो ।