‘भ्रष्टाचार गर्नु  आमाको रगत खानुसरह हो’ भन्ने नारा बाेकेकाे राप्रपा भ्रष्ट्रचारीविरूद्ध जुर्मुरायाे

२९ वैशाख, काठमाडौं । राष्ट्रिय प्रजातन्त्र पार्टी (राप्रपा) भ्रष्टाचार र भ्रष्टाचारीविरुद्ध जुर्मुराएको छ । उसले भ्रष्टाचारीविरुद्ध देशभरबाट प्रधानमन्त्री पुष्पकमल दाहाल प्रचण्डलाई ज्ञापनपत्र बुझाउने कार्याक्रम तय गरेको छ । 

देशका ७७ वटै जिल्लाका प्रमुख जिल्ला अधिकारीमार्फत् प्रधानमन्त्री प्रचण्डलाई भ्रष्टाचार र भ्रष्टाचारीविरुद्ध शुक्रबार दिउँसो १ बजे ज्ञापनपत्र बुझाउन लागिएको राष्ट्रिय प्रजातान्त्रिक युवा संगठन संयोजक तथा अधिवक्ता सुजित केसीले जानकारी दिए । 

अध्यक्ष राजेन्द्र लिङ्देन नेतृत्वको टोलीले भने प्रधानमन्त्री प्रचण्डलाई नै ज्ञापनपत्र बुझाउने कार्यक्रम रहेको राप्रपा प्रवक्ता ज्ञानेन्द्रबहादुरी शाहीले जानकारी दिए । 

संगठित र संस्थागत भ्रष्टाचारविरुद्धको कार्यक्रममा सहभागी हुन सबैमा आह्वान गरेको राप्रपाले केही दिनअघि प्रतिनिधिसभा बैठकमा पनि भ्रष्टाचारविरुद्ध जोडदार आवाज उठाएको थियो । 

नेपाली नागरिकलाई नक्कली भुटानी शरणार्थी बनाएर अमेरिका उडाउने भन्दै करोडौं रुपैयाँ असुलेको धन्दाको विरोध र भ्रष्टाचारविरुद्ध राप्रपा अध्यक्ष राजेन्द्र लिङ्देन लगायत पार्टीका सांसदहरुले सशक्त आवाज उठाएका थिए । भ्रष्टाचारविरुद्ध बोल्न सभामुख देवराज घिमिरेले नदिएको भन्दै उनीहरुले बुधबारा सदनको रोष्ट्रम घेराउ गरेका थिए । 

राप्रपाले सदनदेखि सडकसम्म भ्रष्टाचारविरुद्ध आवाज बुलन्द गर्ने नीति लिएको पार्टीका नेताहरुले बताएका छन् । राप्रपाले निर्वाचिन सांसदहरुलाई ‘भ्रष्टाचार गर्नु  आमाको रगत खानुसरह हो’ भनेर शपथ खुवाएको थियो ।