नेता बस्नेतको निधनमा कांग्रेसले ३ दिन पार्टीको झन्डा झुकाउने

२९ वैशाख, काठमाडौं । नेपाली कांग्रेसले तत्कालीन संविधानसभा सदस्यसमेत रहेका आफ्ना नेता पुरुषोत्तम बस्नेतको निधनको शोकमा ३ दिन पार्टीको झन्डा झुकाउने भएको छ ।

कांग्रेसको इतिहासका लेखकसमेत रहेका बस्नेतको निधनको शोकमा कांग्रेसले पार्टीका केन्द्रीय कार्यालयदेखि देशभरका जिल्ला कार्यालयहरुसम्म ३ दिन पार्टीको झन्डा झुकाउने निर्णय भएको हो । 

कांग्रेसका मुख्य सचिव कृष्णप्रसाद पौडेलले बस्नेतप्रति सम्मान प्रकट गर्न यही वैशाख २९, ३० र ३१ गते केन्द्रीय कार्यालय र जिल्ला कार्यालयहरुमा पार्टीको झन्डा आधा झुकाइने जानकारी दिए । 

उनले वैशाख ३१ गते आइतबारका दिन केन्द्र तथा जिल्लाका सबै कार्यालय बन्द गर्ने र निधनको १३औँ दिनसम्म केन्द्रीय कार्यालय र जिल्ला कार्यालयमा शोक पुस्तिका राख्ने कार्यक्रम निर्धारण गरिएको पनि बताए ।

जननायक बीपी कोइराला स्मृति ट्रस्टका अध्यक्ष राजेन्द्र पराजुलीका अनुसार शुक्रबार बिहान ४ बजे सिफल हाइटस्थित आफ्नै निवासमा बस्नेतको निधन भएको हो । उनी ट्रस्टका कोषाध्यक्ष थिए । उनी २०६२/०६६ सम्म कांग्रेसको आमन्त्रित केन्द्रीय सदस्य थिए। उनी सोलुखुम्बुका कांग्रेसका पूर्वसभापति पनि हुन् । उनले प्रजातन्त्रका लागि ९ वर्ष जेल जीवन पनि बिताएका थिए । 

बस्नेतको निधनप्रति सभापति शेरबहादुर देउवाले दुःख व्यक्त गर्दै भनेका छन्, ‘नेपालको लोकतान्त्रिक आन्दोलनका एक अथक योद्धा, लेखक, साहित्यकार पुरुषोत्तम बस्नेतको निधनको खबरले मलाई अत्यन्त मर्माहत र स्तब्ध बनाएको छ। नेपाली कांग्रेस र नेपालको लोकतान्त्रिक आन्दोलनहरुमा उहाँले पु¥याउनु भएको योगदान पार्टीको इतिहासमा सदा स्मरणीय रहिरहनेछ।’