सर्वोच्चको आदेशमा पूर्वप्रधानमन्त्री इमरान खान रिहा, आज उच्चमा उपस्थित हुने

२९ वैशाख, काठमाडौं । पाकिस्तानका पूर्वप्रधानमन्त्री एवं तेहरिक–ए–इन्साफ (पीटीआई) प्रमुख इमरान खान सर्वोच्च अदालतको आदेशमा बिहीबार साँझ रिहा भएका छन् । उनलाई गत मंगलबार इस्लामावाद उच्च अदालत परिसरबाट बल प्रयोग गरी गिफ्तार गरिएको थियो ।

बिहीबार पाकिस्तानको सर्वोच्च अदालतमा तीन न्यायाधीशको संयुक्त इजलासले पूर्वप्रधानमन्त्री खानलाई रिहा गर्न आदेश जारी गरेको हो । रिहा भएपछि उनी आज अल कादिर ट्रस्ट प्रकरणका लागि इस्लामावाद उच्च अदालत उपस्थित हुने पाकिस्तानी सञ्चार माध्यम डनले जनाएको छ ।

प्रधानन्यायाधीश उमर अता बन्दियालको नेतृत्वमा रहेको उक्त इजलासले खानको गिरफ्तारीलाई अमान्य र कानुनसम्मत नभएको ठहर गरेको थियो । आदेशमा शुक्रबार खान उच्च अदालतमा उपस्थित नहुन्जेल कडा सुरक्षा प्रदान गर्नसमेत आदेश दिएको छ । बिहीबार अल कादिर ट्रस्ट प्रकरणमा नेसनल अकाउन्टिबिलिटी ब्युरोले गरेको गिरफ्तारीलाई अदालतले अमान्य भएको बताएको हो । 

‘पेसीको समयमा खान इस्लामाबाद पुलिसको सुरक्षामा रहनेछन् । पुलिस लाइन मुख्यालयमा आफूले भेट्न चाहेका आफन्त र कानुन व्यवसायीको नाम लिस्ट भने खानले दिनुपर्नेछ’ प्रधानन्याधीश बन्दियालको भनाइलाई उद्धृत गर्दै बीबीसी हिन्दीले लेखेको छ । इस्लामाबाद प्रहरीले खानलाई पक्राउ गरेको थियो ।

उनी पक्राउ परेपछि पाकिस्तानका विभिन्न सहरहरूमा पीटीआईले प्रदर्शन चर्काएको थियो । सोक्रममा सुरक्षाकर्मीसँग झडपमा ८ जनाको ज्यान गएको थियो ।   अर्को कुनै मुद्दामा धरौटी बुझाउन अदालत पुगेका खानलाई भ्रष्टाचारको आरोपमा पक्राउ गरिएको थियो । अल कादिर ट्रस्टको मामिलामा पक्राउ गरेको हो ।

खानले सन् २०१९ डिसेम्बर २६ मा स्थापना गरेको अल कादिर ट्रस्टमा प्रमुख रहँदा ट्रस्टको सम्पत्ति हिनामिनाको आरोप छ । उनकी पत्नी बसुरा बिबिमाथि हिनामिनाको आरोप लगाइएको छ ।