गण्डकी प्रदेशमा मन्त्रिपरिषद विस्तार गरिँदै, माओवादी केन्द्रबाट जुग्जाली मन्त्री बन्ने

२९ वैशाख, पोखरा । नेकपा माओवादी केन्द्रले गण्डकी प्रदेश सरकारमा थप हुने मन्त्री नाम टुंग्याएको छ । जसअनुसार म्याग्दीबाट प्रदेश (ख)बाट निर्वाचित का रेशम जुग्जालीलाई गण्डकी प्रदेश सरकारमा पठाउने निर्णय गरेको छ ।

सत्तारुढ दलबीचको भागबण्डामा पार्टीलाई प्रदेश सरकारमा २ मन्त्रालय पाएको छ । पार्टीबाट प्रदेशसभा सदस्य सुशीला सिम्खडा यसअघि नै बिनाविभागीय मन्त्रीका रूपमा नियुक्त भइसकेकी छन् । 

जुग्जाली अघिल्लो सरकारमा उद्योग, पर्यटन, वन तथा वातावरणमन्त्री थिए । गठबन्धन फेरिएसँगै कांग्रेस नेतृत्वको नयाँ सरकारमा पुनः जुग्जालीलाई नै मन्त्री बनाउने निर्णय माओवादी केन्द्रले गरेको हो ।

प्रदेशको मन्त्रिपरिषद् विस्तार आजै हुने माओवादी केन्द्रका प्रदेशसभा सदस्य कुसुम बुढाले बताए । तर कांग्रेसभित्र आकाङ्‌क्षी धेरै भएकाले कांग्रेसले पाएको मन्त्रालयको जिम्मेवारी टुंग्याउन सकेको छैन । 

प्रदेशको ७ मध्ये मुख्यमन्त्रीसहित चार मन्त्रालय कांग्रेसले, दुई माओवादी केन्द्रले र एक नेकपा एकीकृत समाजवादीले लिने सहमति छ ।