‘कृषिविज्ञ’ मदन राई यौन दुर्व्यवहार आरोपमा पक्राउ

२९ वैशाख, काठमाडौं । आफूलाई कृषिविज्ञका रुपमा चिनाउँदै आएका खोटाङका मदन राईलाई प्रहरीले जबर्जस्ती करणीको आरोपमा पक्राउ गरेको छ ।

७५ वर्षीय मदनले आफैंले स्थापना गरेको फाउन्डेसनमा राखिएका बालबालिकामाथि यौन दुर्व्यवहार गरेको घटनामा अनुसन्धान गर्न शुक्रबार पक्राउ गरिएको प्रहरीले जनाएको छ ।

उनीद्वारा सञ्चालित ‘शुभद्रा मदन फाउन्डेसन’बाटै पक्राउ गरिएको जिल्ला प्रहरी कार्यालय खोटाङका डीएसपी मञ्जिल मुकारूङले बताए । 
उनले सञ्चालित फाउन्डेसनमा राखिएका बालिकालाई पटकपटक यौन दुर्व्यवहार गरेको घटना सार्वजनिक भएको थियो ।

मदनले फाउन्डेसनमा पढाउन भनेर थुप्रै बालबालिकालाई राखेका छन् । नौ वर्षपहिले स्थापना गरिएको फाउन्डेसन रुपाकोट मझुवागढी नगरपालिकामा पर्ने खोटाङ सदरमुकाममा जजागृति उच्च माध्यमिक विद्यालय परिसरमा संचालित छ । उनले त्यहाँ ‘गर्दै, सिक्दै’ कार्यक्रम लागू गरेको छ ।

उनको हर्कत सार्वजनिक भएपछि बालबालिका संरक्षणसम्बन्धी संघ संगठनहरुले विज्ञप्ति निकालेर विरोध जनाएका छन् । ‘बालबालिका शान्ति क्षेत्र संरक्षण अभियान (सिजप)’का अध्यक्ष राजेश शर्मा र महासचिव मिना शर्माले बिहीबार संयुक्त विज्ञप्ति निकालेर विरोध जनाउँर्दै राईलाई कारवाही गर्न माग गरेका थिए ।