कैलालीमा ‘भूमाफिया’ले हडपेको जग्गा नेकपाद्वारा ‘कब्जा’

२९ वैशाख, काठमाडौं । कैलालीको विभिन्न क्षेत्रमा स्थानीयको जग्गा ‘भूमाफिया’ले झुक्यान र ढँटछलमा पारेर आफ्नो नाममा हडपेको पाइएको छ । सो जग्गालाई नेत्रविक्रम चन्द ‘विप्ल्व’ नेतृत्वको नेपाल कम्युनिष्ट पार्टी (नेकपा)ले ‘कब्जा’ गरेको जनाइएको छ । 

नेकपाको मध्य कैलाली जिल्ला समितिले बिहीबार एक प्रेस विज्ञप्ति जारी गर्दै जोशीपुर गाउँपालिका–४ खर्चुवाका खुशीराम डगौराको ०–६–१० धुर, लक्षीराम डगौराको ०–९–३ धूर जग्गा माफियाले झुक्यानमा पारी आफ्नो नाममा पारेर उठीवास लगाएको जनाइएको छ । 

समितिको लेटर प्याडमा जनसत्ता प्रमुख आजादको नाममा नियन्त्रण लिएको उल्लेख गरिएको उक्त विज्ञप्तिमा खुशीरामको जग्गा सागर भनिने नारायण प्रसाद जोशी, लक्षीरामको जग्गा बाँकेको नेपालगञ्ज उपमहानगरपालिका–१९ बस्ने अब्दुल मावुद वागवानको नामा जालीसाजीपूर्वक दर्ता पाएको उल्लेख छ । यस्तै, अन्य सयौं स्थानीयको जग्गा माफियाको जालोमा परेको र पीडितहरुले न्यायका लागि माग गरिरहेको समेत जनाइएको छ । 

‘माफिया’काे नाम र तस्बिर अंकित  ब्यानर राखेर जग्गा कब्जा गरेकाे जनाइएकाे छ । दुवै जनाले डगौराद्वयलाई अटो व्यवसायका लागि जग्गा बैंकमा धरौटी राखेर रकम निकाली अटो खरिद गरिदिने बहानामा मालपोत कार्यालयका कर्मचारीसँगको मिलेमतोमा आफ्नो नाममा गरेको र सोझा डगौराद्वयलाई उठीबास लगाएको भन्दै जग्गा फिर्ता नभएसम्म पार्टीले कब्जा गरेको जनाइएको छ । 

नारदप्रसाद र अब्दुललाई चाँडोभन्दा सम्पर्क आएर उक्त जग्गा डगरौलाई फिर्ता गर्न माग गर्दै नगरिए त्यसबाट उत्पन्न परिणामको जिम्मेवारी स्वयं दुई जना हुने चेतावनी दिइएको छ ।