विपद् पूर्वतयारीको कामलाई प्रभावकारी बनाउन उपप्रधानमन्त्री श्रेष्ठको निर्देशन

२९ वैशाख, काठमाडौं । उपप्रधान तथा गृहमन्त्री नारायणकाजी श्रेष्ठले विपद् पूर्वतयारीको कामलाई व्यवस्थित र प्रभावकारी ढंगले गर्न निर्देशन दिएका छन् । 

शुक्रबार सिंहदरबारमा बसेको विपद् जोखिम न्यूनीकरण तथा व्यवस्थापन प्राधिकरणकाे कार्यकारी समितिको बैठकमा बोल्दै गृहमन्त्री श्रेष्ठले विपद् पूर्वतयारीको कामलाई व्यवस्थित र प्रभावकारी ढंगले अगाडि बढाउन निर्देशन दिएका हुन् । उनले विपद व्यवस्थापनमा आगामी दिनमा कुनैपनि कमी हुन नदिन र पुरानै अवस्था दोहोरिएको आफूले सुन्न र हेर्न नपरोस् भनी सम्बन्धित निकायलाई सचेत गराए ।

आसन्न मनसुन पूर्वतयारी तथा प्रतिकार्यको ठोस कार्ययोजना आगामी बैठकमा बनाउने पनि निर्णय भएको छ । बैठकमा संघीय मामिला तथा सामान्य प्रशासनमन्त्री अमनलाल मोदीले हिउँदमा शितलहर तथा वर्षा याममा बाढी, पहिरो आउने कुरा निश्चितजस्तै भएकाले विपद्का लागि प्रभावकारी ढंगले पूर्वतयारी गर्नुपर्ने बताए । उनले विपद् जोखिम व्यवस्थापनको नाममा आर्थिक अनियमितता नगर्न कर्मचारीलाई निर्देशन दिए ।

यसतै, स्वास्थ्य तथा जनसंख्यामन्त्री मोहनबहादुर बस्नेतले आगलागी नियन्त्रणका लागि भरपर्दो कदम चाल्न आवश्यक रहेको बताए । वन, जंगलमा आगो लगाउनेलाई कडा कारबाही गरेर आगलागीका घटना रोक्न कानुन आवश्यक रहेको बताए ।