संसद सचिवालयमा टोपबहादुरको ‘बिरामी भएकाे पत्र’ बुझाउने मान्छेकाे खोजीमा लाग्याे प्रहरी

२९ वैशाख, काठमाडौं । प्रहरीले नक्कली भुटानी शरणार्थी ठगी प्रकरणमा फरार रहेका नेकपा (एमाले) सांसद टोपबहादुर रायमाझी ‘बिरामी’ रहेको पत्र संसदमा बुझाउने व्यक्ति खोजी सुरु गरेको छ । खोज्न नेपाल प्रहरीको केन्द्रीय अनुसन्धान ब्यूरो (सीआईबी)ले आज संसद सचिवालयबाट सीसीटिभी फुटेज लिएर अध्ययन सुरु गरेको छ । 

सीआईबीले अध्ययनका लागि सीसी टिभी लगेको पुष्टि संघीय संसद सचिवालयका प्रवक्ता एकराम गिरीले गरेका छन् । प्रकरणमा जोडिएपछि पक्राउका लागि प्रहरीले खोजी रहेका बेला अघिल्लो बुधबार साँझबाट फरार भएका रायमाझीले आइतबारबाट सुरु भएको बजेट अधिवेशनअन्तर्गत प्रतिनिधिसभा बैठकको दोस्रो दिन सोमबार संसद सचिवालयमा ‘आफू बिरामी रहेको’ र त्यसकारण बैठकमा उपस्थित हुन नसकेको व्यहोरासहित पत्र दर्ता गराएका थिए । 

उनले यही बुधबार पनि आफू बिरामी रहेको र त्यही दिन प्रहरीमा हाजिर हुने भनी स्टाटस लेखेका थिए । तैपनि उनी फरार रहेपछि उनको पत्र बोकेर सचिवलायमा दर्ता गर्न आउने व्यक्ति को हुन् ? भन्नेतर्फ प्रहरी अनुसन्धानमा लागेको हो । सभामुखको कार्यकक्ष आसपासको सीसीटीभी नियन्त्रणमा लिइएको छ ।

एमालेले मंगलबार नै उनको केन्द्रीय पार्टी सचिव पद अनुसन्धान टुंगो नलागेसम्मका लागि निलम्बन गरेको छ । उनी अर्घाखाँचीबाट प्रतिनिधिसभा सदस्य (सांसद) समेत हुन् । अहिले ललितपुरकाे च्यालसमा एमालेकाे केन्द्रीय समितिकाे बैठक चलिरहेकाे छ ।

यो पनि पढ्नुहोस