केन्द्रको घण्टी बजेपछि मन्त्रीको सूचीबाट मनाङे आउट

२९ वैशाख, पोखरा । गण्डकी प्रदेशका मुख्यमन्त्री सुरेन्द्र पाण्डेले एकीकृत समाजवादीका सांसद दीपक मनाङेको  नाम मन्त्रीको लिष्टबाट हटाएका छन् । उनले मनाङेको ठाउँमा कांग्रेसकै जीतप्रकाश आलेलाई ल्याएका छन् ।  तनहुँ कांगेसका जिल्ला सभापतिसमेत रहेका आले राष्ट्रपति रामचन्द्र पौडेल निकट हुन् । रामचन्द्रकै जोडबलमा मुख्यमन्त्री पाण्डेले मनाङेलाई हटाएर आलेलाई मन्त्री बनाएका हुन् । 

शुक्रबार बिहान मनाङे मन्त्रीमा नियुक्त भएका थिए । तर, उनी शपथ लिनु अगाडि हटाइए । आलेले मुख्यमन्त्रीको कार्यालयबाट शपथ खान खबर आएको पुष्टि गरेका छन् । शुक्रबार बिहान ३ मन्त्रीको नाम टुंगो लगाइ सकेपछि मनाङेलाई मन्त्री बनाउने सन्दर्भमा शीर्ष नेतासँग पाण्डेले फोन संवाद थालेका थिए ।

मनाङेलाई मन्त्री नबनाए पनि गण्डकीमा सहज बहुमत पुग्ने भएकाले पाण्डे सुरुदेखि नै मन्त्री बनाउने पक्षमा थिएनन् । तर, केन्द्रको गठबन्धन बिग्रन सक्ने भएकाले बनाउनुपर्ने दबाब उनीमाथि थियो । शुक्रबार बिहानसम्म पनि एकीकृत समाजवादीबाट मनाङे मन्त्री बन्न सक्ने पाण्डेले बताइरहेका थिए ।