बैंक ब्याजदर ७ प्रतिशतभन्दा तल नझार्ने राष्ट्र बैंकको नीतिगत निर्णय छ : गभर्नर अधिकारी

२९ वैशाख, काठमाडौं । नेपाल राष्ट्र बैंकका गभर्नर महाप्रसाद अधिकारीले बैंकको ब्याज दर अझै घट्ने बताएका छन् । नेपाल राष्ट्रले चालु आवको तेस्रो त्रैमासिक मौन्द्रिक नीति समीक्षा शुक्रबार सार्वजनिक गर्ने क्रममा बोल्दै गभर्नर अधिकरीले ब्याजदरमा कमी आएसँगै घटेर अर्थतन्त्र चलायमान हुने बताए ।

तेस्रो मौद्रिक नीति समीक्षाले बैंक ब्याजदर १ प्रतिशतले घटाएर ७.५ प्रतिशत कायम गरेको छ । साथै ५ करोडभन्दा तलको कर्जाको पुनतालिकीकरण र पुनः संरचना गर्ने व्यवस्था पनि गरिएको छ । 

घट्दै गएको ब्याजदर अझै घट्ने गरी नै व्यवस्था गरिएको छ’ उनले भने, ‘केन्द्रीय बैंकले लिएको लचिलो नीतिले शिथिल रहेको अर्थतन्त्र गतिशील हुनेछ ।’ उनले ब्याजदर ७ विन्दूबाट तल नजाने जानकारी पनि दिए ।

राष्ट्र बैंकले समीक्षा कार्यक्रममा लचिलो भएको तर नीतिगत निर्णय गर्न कमजोर देखिएको भन्ने संचारकर्मीहरुको प्रश्नमा उनले बैंकदर सम्बन्धी निर्णय गएको साउन ६ मा नै भएको र यसमा राष्ट्र बैंक दायाँबायाँ नहुने बताए ।

उनले राष्ट्र बैंकले आगामी दिनमा बैंकहरुलाई जारी गर्ने सर्कुलरमा सुविधाको विषय थप गर्दे जाने बताए । कुन ऋणीको कति कर्जा र कसरी पुनःतालिकीकरण र पुनःसंरचना गर्ने अधिकार बैंक तथा वित्तीय संस्थालाई नै  दिएको उनले बताए । 

कार्यक्रममा बोल्दै गभर्नर अधिकारीले चालु आवमा बैंक ब्याजदर ७ प्रतिशतभन्दा तल नझर्ने राष्ट्र बैंकको नीतिगत निर्णय रहेको उनले स्पष्ट पारे । आन्तरिक आर्थिक गतिविधिहरु चलायमान बनाउन सहयोग पुर्याउने गरी केही लचिलो भएको उनकाे भनाइ छ ।