सेनाको एण्टी फायर फाईटिङ प्रविधिले आगलागीबाट जोगायो रामेछाप बजार

२९ वैशाख, काठमाडौं । रामेछापको पुरानो सदरमुकाम बजार आगलागीबाट जोगिएको छ । रामेछाप नगरपालिका–८ को वादीपाखा जंगलमा बिहीबार राति लागेको आगो फैलिएर बजारतर्फ बढेपछि नेपाली सेनाको टोली र स्थानीयले नियन्त्रणमा लिएर बजारलाई जोगाएका हुन् ।

आगो निभाउन रामेछाप ब्यारेकबाट सेनाकाे फायर फाइटिङ प्रविधिसहित करिब २०० जनाको टोली खटिएकाे थियाे ।

सेना समयमा पुग्न नसकेको भए जिल्ला अस्पताल रामेछापको अक्सिजन प्लान्ट र बजारका घर जल्ने स्थानीयले बताए । समयमै टोली परिचालन गरिएकाले ठूलो जनधनको क्षति हुनबाट जोगाउन सफल सेनाले जनाएको छ । 

जंगलको आगो बढ्न सक्ने विश्लेषणसहित बजारदेखि करिब १ किलोमिटरको फायर लेन बनाई एण्टी फायर फाईटिङ गरिएको सेनाले जनायो ।