पूर्वसभासद् आङटावा शेर्पाविरुद्ध पक्राउ पुर्जी जारी

३१ वैशाख, काठमाडौं । नक्कली भुटानी शरणार्थी प्रकरणमा पूर्व सभासद आङटावा शेर्पाविरुद्ध पक्राउ पुर्जी जारी भएको छ । ठेकेदार समेत रहेका रामेछापका शेर्पाविरुद्ध जिल्ला अदालतबाट प्रहरीले पक्राउ पुर्जी लिएको  हो । 

शेर्पाले नेपाली नागरिकलाई भुटानी शरणार्थी बनाएर अमेरिका पठाइदिने भन्दै जिल्लाका विभिन्न व्यक्तिहरूबाट रकम ठगी गरेको पाइएको छ । सो ठगी कसुरमा अनुसन्धानका लागि पक्राउका लागि पुर्जी लिइएको हो । ठगी प्रकरण सार्वजनिक भएपछि प्रहरी हिरासतमा रहेका सानु भण्डारी लगायतलाई हिरासतमा गएर भेटेका थिए । भेटमा उनले आफ्नो र कांग्रेसका ‘ठूला’ नेताहरूको नाम नलिन सुझाएकाे आरोप छ । 

भण्डारीलाई शेर्पाले चैत १८ मा हिरासतबाट अलग एक कोठामा घन्टौं कुराकानी गरेको स्रोतको दाबी छ । भण्डारी चैत १२ गतेदेखि हिरासतमा छन् । शनिबार काठमाडौंको मैजुबहालस्थित शेर्पाको घरमा प्रहरीले छापा मारेको थियो । यही विषय उठाउँदै नेकपा (एमाले)का अध्यक्ष केपी शर्मा ओलीले सरकारको आलोचना गर्दै आएका छन् ।