सडक अलपत्र पार्ने सांसदको फोटो राखेर ओखलढुंगामा प्रदर्शन

३१ वैशाख, काठमाडौं । ओखलढुंगामा सडकको ठेक्का लिएर राजनीतिक पहुँचका आधारमा निर्माण अलपत्र छाड्ने ठेकेदार एवं कांग्रेसका सांसद कान्छाराम भनिने पूर्णबहादुर तामाङविरुद्ध स्थानीयले विरोध प्रदर्शन गरेका छन् । 

सांसद तामाङले ठेक्का लिएको ओखलढुंगा सदरमुकामदेखि निशंखेसम्मको सडक ग्राभेलको काम वर्षौंदेखि अलपत्र छ । ठेक्का लिएर पेटी ठेकेदारलाई काम जिम्मा दिइ वर्षौसम्म काम अलपत्र पारेको भन्दै ठेकेदार तामाङविरुद्ध स्थानीयले संघर्ष समिति बनाएर आन्दोलन थालेका हुन् । तामाङले काम गरेको पैसा समेत नदिएको आन्दोलनकारीको भनाइ छ ।

यसअघि आफूहरुले अलपत्र निर्णय कार्यबारे ठेक्का लगाउने निकाय पूर्वाधार विकास कार्यालय र जिल्ला प्रशासन कार्यालयको ध्यानाकर्षण गराए पनि कारवाही नगरिएको भन्दै उनीहरुले आक्रोश पोखेका छन् । ठेक्का तत्काल रद्द गरी कारवाही गर्न माग गर्दै आक्रोशित स्थानीयले तामाङको अनुहारमा गोबर छ्यापेको तस्बिरसहितको ब्यानर प्रर्दशन गरेका छन् । प्रदर्शनमा ४ सय स्थानीयले आइतबार सोलुखुम्बु–ओखलढुंगा–हर्कपुर सडक खण्डमा पर्ने गोरुमारे भन्ज्याङमा सडक अवरुद्ध गरी राजमार्गमा ‘भ्रष्ट ठेकेदार मूर्दावाद’नारासहित प्रदर्शन गरेका छन् ।  ब्यानरमा अलपत्र छाडिएका सडकको तस्बिर र ११ बुँदे माग अंकित गरेका छन् ।

कान्छाराम कन्सट्रक्सनले  १२ किलोमिटर सडक ग्राभेलका लागि १६ करोड ६४ लाख ६५ हजार आठ सय ३८ रुपैयाँमा एक वर्षभित्र सम्पन्न गर्ने गरी २०७६ पुस ९ गते ठेक्का पाएको थियो । काम सम्पन्न नगर्दा सडकमा उड्ने धुलोले आसपासका स्थानीयको स्वास्थ्यमै असर पुगेको उनीहरुले बताए । सडक निर्माण तत्काल सम्पन्न नगरे आन्दोलन चर्काउने संघर्ष समितिका अध्यक्ष सुवास गुरुङले बताए ।

ठेकेदार तामाङ रामेछापका कांग्रेस जिल्ला सभापति तथा संघीय सांसद हुन् । उनी पार्टी सभापति शेरबहादुर देउवानिकटका हुन् । उनले निकटस्थहरुसँग आफूले सांसदको टिकट पाउन ४ करोड खर्च गरेको बताउने गरेका छन् । 

यस्तै, आन्दोलनमा उत्रिएका स्थानीयले ओखलढुंगाका प्रतिनिधिसभाका सांसद रामहरि खतिवडा र प्रदेश सांसद प्रदीप सुनुवारविरुद्ध समेत आक्रोश पोखेका छन् । उनीहरुमाथि ठेकेदार संरक्षण गरेको आरोप लगाए ।