पशुपतिमा विद्युतीय शवदाह निःशुल्क गर्ने तयारी

 ३१ वैशाख, काठमाडौं । पशुपति आर्यघाटस्थित विद्युतीय शवदाह गृहमा दाहसंस्कारका लागि ल्याइने शवलाई निःशुल्क शवदाहको व्यवस्था गर्ने तयारी थालेको छ । 

संस्कृति, पर्यटन तथा नागरिक उडडयन मन्त्रालयमा मन्त्री सुदन किरातीको अध्यक्षतामा बसेको पशुपति क्षेत्र विकास कोष सञ्चालक परिषद्को बैठकले थप ४ विद्युतीय शवदाह गृहको व्यवस्था गरी निःशुल्क दाहसंस्कारको व्यवस्था गर्ने निर्णय गरेको हो । थप विद्युतीय शवदाह गृह यन्त्र खरिदका लागि कोषले आफ्नै स्रोतबाट रू आठ करोड छुट्याएको छ । निःशुल्क सञ्चालनका लागि कोषले रू एक करोडको अक्षय कोष समेत स्थापना गरेको कोष कार्यालयले जनाएको छ ।

कोषले कार्यविधि बनाएपछि कोष सञ्चालक परिषद्ले दाहसंस्कारलाई निशुल्क गरिने कोषका सदस्य सचिव डा. मिलनकुमार थापाले बताए । 
पशुपतिमा रहेका दुई वटा विद्युतीय शवदाह गृहमध्ये एउटाको यन्त्र बिग्रिएपछि एउटा मात्र संचालनमा छ । 

पशुपति आर्यघाटमा शवको दाहसंस्कार गरेबापत् दाउराबाट जलाउने घाटमा रू १५ हजार र विद्युतीय शवदाह गृहमा  चार हजार शुल्क तोकिएको छ । निशुल्क कार्यविधि लागू भएपछि भने इच्छुक दाताका लागि स्वेच्छाले कोषको खातामा आर्थिक सहयोग गर्न चाहेमा विकल्प खुला राखिने कोषले जनाएको छ ।