कृषिविज्ञ मदन राईलाई ७ दिन हिरासतमा राखेर अनुसन्धान गर्न अदालतको अनुमति

३१ वैशाख, काठमाडौं । बाल यौन दुव्र्यवहार गरेको आरोपमा पक्राउ परेका कृषि विज्ञ भनेर चिनिने खोटाङका मदन राईलाई ७ दिन प्रहरी हिरासतमा राखेर अनुसन्धान गर्न प्रहरीलाई जिल्ला अदालत खोटाङले अनुमति दिएको छ । 

उनी आफैंले संचालन गर्दै आएको शुभद्र मदन फाउण्डेशनका बालबालिकालाई यौन दुव्यर्वहार र अश्लिल गतिविधि गरेको आरोपमा राईलाई शुक्रबार पक्राउ गरिएको थियो । ७५ वर्षीय राइईमाथि अश्लिल गतिविधि र यौनजन्य कुराकानी गरेको आरोप छ । 

भिडियो सार्वजनिक भएपछि उनले आफू उमेरले धेरै भइसकेको र आफूले गरेको गतिविधि र कुराकानीलाई हिंसाको रुपमा नभई शिक्षाको रुपमा लिन आग्रह गरेका थिए । उनले बालबालिकालाई कृषिसम्बन्धी विभिन्न काममा लगाउने, उत्पादनबारे प्रयोगात्मक शिक्षा दिने गर्दै आएपनि पछिल्लो समयमा प्रजननसम्बन्धी विषयमा नाबालिगहरुलाई अश्लिल र ‘फोहोरी’ शब्दवालीमार्फत वा आफैं नघ्न बनेर ‘अनुभूत’ गराउने तथा मसाज गराउने गरिएको भडियो बाहिरिएको थियो । 

सोपछि उनको हर्कको विरोध गर्दै उनलाई कानूनी कारवाहीको दायरामा ल्याउन माग गर्दै बालबालिका संरक्षणसम्बन्धी काम गर्ने विभिन संघ संगठनहरुले विज्ञप्ति निकालेर विरोध गरेका थिए । त्यसपछि उनले आफूले हिंसा नगरेको, बरु शिक्षा सिकाएको दाबी गर्दै जेल बस्नै परे बस्न तयारी रहेको बताएका थिए ।