खाँणसहित १२ जनालाई थप ४ दिन हिरासतमा राख्न अनुमति, थपिएको समयभित्र अनुसन्धान सक्न निर्देशन

३१ वैशाख, काठमाडौं । काठमाडौं जिल्ला अदालतले नक्कली भुटानी शरणार्थी प्रकरणमा पक्राउ परेका कांग्रेस नेता एवं पूर्वगृहमन्त्री बालकृष्ण खाँणसहित १२ जनालाई थप ४ दिन हिरासतमा राखेर अनुसन्धान गर्न अनुमति दिएको छ । उनीहरुलाई प्रहरीले म्याद थपका लागि लगेको थियो । यस प्रकरणमा पक्राउ पुर्जी जारी भएका पूर्वउपप्रधानमन्त्री टोपबहादुर रायमाझी भने फरार छन् ।
  
जिल्ला सरकारी वकीलको कार्यालय काठमाडौंले ४ दिन म्याद थपका लागि जिल्ला अदालतसमक्ष प्रस्ताव  पेस गरेको थियो ।  केही आरोपितका वकीलहरुले थुनामा नराखी हाजिर जमानीमा छाडेर अनुसन्धान गर्न सकिने भन्दै म्याद थप्न आवश्यक नरहेको बहस गरिरहेका थिए । उनीहरुको बहस सकिएपछि जिल्ला अदालतले म्याद थप गर्ने/नगर्ने वा क–कसका हकमा कति दिन थप गर्ने भन्ने निर्णय दिनेछ ।

सरकारी वकिलको कार्यालय, काठमाडौंले पनि अनुसन्धान सकेर ४ दिनभित्र रायसहितको प्रतिवेदन पेश गर्न निर्देशहन दिएको छ ।  सरकारी वकिलको कार्यालयलाई  यो मुद्दा ६० दिनभित्र अदालतमा पुर्याउन  अध्ययनको लागि पनि समय चाहिने भएकाले चार दिनभित्र अनुसन्धान प्रतिवेदन बुझाउन भनिएको कार्यालयले जनाएको छ । 

भुटानी शरणार्थी बनाएर अमेरिका लग्ने भन्दै नेपाली नागरिकबाट रकम असुलेको आरोपमा उनीहरुलाई विभिन्न मितिमा प्रहरी पक्राउ गरेको थियो । यस प्रकरणमा पूर्वगृहमन्त्री खाँण, तत्कालीन गृहमन्त्री रामबहादुर थापाका सल्लाहकार इन्द्रजीत राई, नेपाल सरकारका सचिव टेकनारायण पाण्डे, एमाले नेता तथा पूर्वमन्त्री टोपबहादुर रायमाझीका छोरा सन्दीप रायमाझी, गिरोहका नाइके केशव दुलाल, सानु भण्डारी, टंक गुरुङ, सागर थुलुङ राईलगायत छन् ।