संसदमा टिसर्ट र जिन्स पाइन्ट लगाउने सांसदलाई प्रवेश निषेध

३१ वैशाख, काठमाडौं । संघीय संसद बैठकमा सहभागी हुँदा सांसदहरुलाई टिसर्ट र जिन्स पाइन्ट लगाउन निषेध गरेको छ । आइतबार सिंहदरबारमा  सभामुख देवराज घिमिरेको अध्यक्षतामा बसेको कार्यव्यवस्था परामर्श समितिको बैठकले सांसदलाई मर्यादित पोशाक र अनिवार्य रुपमा लोगो लगाउन निर्देशन दिने निर्णय गरेको हो । 

बैठकमा सभामुख घिमिरेले पोशाक औपचारिक, मौलिक सँस्कृति र परम्परा वा पहिचान झल्किने मर्यादित भेषभूषा वा पोशाक समेतमा ध्यान दिन सांसदहरुलाई निर्देशन दिएका थिए । प्रतिनिधिसभा नियमावली २०७९ को नियम २४२ मा पोशाक र प्रतीक चिह्न सम्बन्धी व्यवस्था छ ।