काठमाडौंको बूढानिलकण्ठबाट पक्राउ परे टोपबहादुर रायमाझी

१ जेठ, काठमाडौं । पूर्व उपप्रधानमन्त्री एवं नेकपा एमालेका निलम्बित सचिव टोपबहादुर रायमाझी पक्राउ परेका छन् । प्रतिनिधिसभा सदस्य समेत रहेका उनलाई प्रहरीले आइतबार साँझ काठमाडौंको बूढानिलकण्ठबाट विशेष व्यूरोले पक्राउ गरेको हो । 

बूढानिकण्ठको पासीकोटस्थित एक घरमा बसेको बेला उनलाई प्रहरीले पक्राउ गरेको हो । नेपालीलाई भुटानी शरणार्थी बनाएर अमेरिका पठाउने नाममा यसअघि पक्राउ परेकाहरुको बयानका आधारमा प्रहरीले उनीविरुद्ध वैशाख २० मा पक्राउ पुर्जी 'वारेन्ट' जारी गरेको थियो ।

त्यससता फरार रहँदै आएका उनलाई आइतबार भने प्रहरीले पक्राउ गर्न सफल भएको हो । उनी भारत भागेको आशंका गरिएपनि काठमाडौंमै भेटिएका हुन् ।