सरकारी वकिलको कार्यालयमा खाँणको बयान लिन सुरु

१ जेष्ठ, काठमाडौं । नक्कली भुटानी शरणार्थी प्रकरणमा हिरासतमा रहेका पूर्वगृहमन्त्री बालकृष्ण खाँणलाई प्रहरीले सोमबार पनि बयानका लागि सरकारी वकिलको कार्यालय बबरमहल पुर्याएको छ । उनले अहिले सरकारी वकिलसमक्ष बयान दिइरहेका छन् । 

पूर्वगृहमन्त्री खाँणलाई हिरासतमा राखेर अनुसन्धानका लागि आइतबार चार दिनको म्याद थप गरिएको थियो । नक्कली भुटानी शरणार्थी बनाएर अमेरिका लैजाने भन्दै गरिएको ठगी प्रकरणमा पूर्वगृहमन्त्री खाँणको प्रत्यक्ष संलग्नता रहेको प्रहरीको प्रारम्भिक अनुसन्धानमा खुलेपछि उनी गत हप्ता पक्राउ परेका थिए । 

यही प्रकरणमा मुछिएपछि फरार रहेका एमालेका सांसद एवं पूर्वमन्त्री टोपबहादुर रायमाझीलाई प्रहरीले हिजो रातीमात्र बुढानिलकण्ठबाट पक्राउ गरेको छ । प्रकरणमा हालसम्म १३ जना पक्राउ परेका छन् ।